U23 World Wrestling Championship 2024: भारताचा १८ वर्षीय कुस्तीपटू चिराग चिगक्काने मोठा पराक्रम केला आहे. त्याने २३ वर्षांखालील जागतिक कुस्ती अजिंक्यपद स्पर्धेत सुवर्णपदकाला गवसणी घातली आहे. चिरागने मुलांच्या फ्री स्टाईल ५७ किलो वजनी गटात सुवर्णपदक जिंकण्याचा कारनामा केला आहे.
अल्बेनियातील तिराना येथे झालेल्या या स्पर्धेत अंतिम सामन्यात चिरागने किर्गिस्तानच्या अब्दिमालिक काराचावचा ४-३ अशा फरकाने पराभव केला आणि सुवर्णपदकाला गवसणी घातली. तो २३ वर्षांखालील जागतिक कुस्ती अजिंक्यपद स्पर्धेत सुवर्णपदक जिंकणारा भारताचा दुसराच पुरुष कुस्तीपटू ठरला आहे.
