Commonwealth Games 2022 : कोरोनाची धास्ती! भारताच्या ध्वजधारक सिंधूच्या रिपोर्टमध्ये...

नवी दिल्ली : राष्ट्रकुल स्पर्धेसाठी (Commonwealth Games 2022) भारतीय संघ रवाना झाला आहे. ऑलिम्पिक पदक विजेत्या पीव्ही सिंधू (PV Sindhu) नीरज चोप्राच्या अनुपस्थितीत भारताचा ध्वज आपल्या खांद्यावर (Indian Flagbearer) घेणार आहे. मात्र याच पीव्ही सिंधूला कोरोनाची (Corona) धास्ती वाटू लागली आहे. कारण तिच्या आरटी - पीसीआर चाचणीच्या (RT - PCR Test) अहवालात काही गडबड दिसत आहे. त्यामुळे तिला सध्या विलगीकरणात ठेवण्यात आल्याचे वृत्त टाईम्स ऑफ इंडियाने दिले आहे.

भारताचा 10 सदसीय बॅडमिंटनचा संघ हैदराबादहून बर्मिंगहमसाठी 25 जुलैला रवाना झाला. बर्मिंगहममधील टाईम्स ऑफ इंडियाच्या सूत्रांनी दिलेल्या माहितीनुसार पीव्ही सिंधूच्या आरटी - पीसीआर चाचणीत काहीतरी गडबड दिसत आहे. ती राष्ट्रकुल स्पर्धेच्या व्हिलेजमध्ये दाखल झाली आहे मात्र तिला निरीक्षणाखाली ठेवण्यात आले आहे.

पीव्ही सिंधूने गोल्ड कोस्ट राष्ट्रकुल स्पर्धेत रौप्य पदक पटकावले होते. तिला आता इतर संघापासून विलगीकरणात ठेवले आहे. हे विलगीकरण दुसऱ्या कोरोना चाचणीचा अहवाल येईपर्यंत असणार आहे. त्यामुळे सर्व खेळाडू आणि चाहते देखील सिंधूचा दुसरा अहवाल निगेटिव्ह यावा यासाठी देव पाण्यात घालून बसले आहेत. अशा अनिश्चिततेच्या वातावरणात भारताचे बर्मिंगहम राष्ट्रकुल स्पर्धेचे मिशन प्रमुख प्रशासनाच्या सातत्याने संपर्क ठेवून आहेत.

नियमानुसार युकेमध्ये दाखल झाल्यानंतर खेळाडूची 72 तासात आरटी पीसीआर चाचणी करणे बंधनकारक आहे. आता भारतीय खेळाडूंची बर्मिंहरममध्ये दाखल झाल्यानंतर दुसरी कोरोना चाचणी करण्यात येणार आहे. सूत्रांनी दिलेल्या माहितीनुसार सिंधूला कोरोनाची लागण झाल्याची शक्यता निर्माण झाली होती. त्यामुळेच भारतीय ऑलिम्पिक असोसिएशनने राष्ट्रकुल स्पर्धेसाठी तिचे ध्वजधारक म्हणून नाव घोषित करण्यास विलंब केला होता.

भारतीय ऑलिम्पिक असोसिएशनने नीरज चोप्राच्या माघारीनंतर भारताचा ध्वजधारक म्हणून सिंधू, लोव्हलिना आणि मीराबाई चानू यांच्या नावाचा विचार केला होता. सिंधूचे नाव त्यांनी घोषित करण्यात आले आहे.