Copa America 2024 Final : मेस्सी विजेतेपदाचे वर्तुळ पूर्ण करणार? कोपा अमेरिका स्पर्धेत कोलंबियाच्या धसमुसळ्या खेळाचे आव्हान

गतवर्षी कोपा अमेरिका करंडक जिंकून लिओनेल मेस्सीने आपल्या मुकुटात आंतरराष्ट्रीय विजेतेपदाचा पहिला तुरा खोवला होता. त्यानंतर विश्वविजेतेपदाचा करंडकही उंचावला आणि या वेळीही कोपा अमेरिका करंडक जिंकून तो वर्तुळ पूर्ण करणार का, याची उत्सुकता फुटबॉल विश्वाला लागून राहिली आहे.

कोपा अमेरिका फुटबॉल स्पर्धेत अर्जेंटिना आणि कोलंबिया यांच्यात अंतिम सामना होत आहे. भारतीय प्रमाणवेळेनुसार सोमवारी सकाळी ५.३० वाजता ही अंतिम लढत सुरू होईल. त्यावेळी सर्वांचे लक्ष पुन्हा एकदा मेस्सीवर असणार आहे.

अर्जेंटिनाने विश्वविजेतेपदाच्या थाटात अंतिम फेरी गाठली. उपांत्य सामन्यात त्यांनी कॅनडाचे आव्हान मोडून काढले. यात मेस्सीचा गोल निर्णायक ठरला. तर दुसऱ्या उपांत्य सामन्यात १० खेळाडूंसह खेळणाऱ्या कोलंबियाने उरुग्वेवर मात केली. या सामन्यातून कोलंबियाचा स्टार खेळाडू जेम्स रॉड्रिगेझने आपले नाव इतिहासात लिहिले. कोपा अमेरिका स्पर्धेत गोलांसाठी सहाय्य करण्याचा विक्रम त्याने मेस्सीला मागे टाकून मोडला. या स्पर्धेत त्याने सहा गोलांना सहाय्य केले. २०२१च्या स्पर्धेत मेस्सीने पाच गोलांना सहाय्य करण्याचा विक्रम केला होता.

अंतिम सामन्यात अर्जेंटिनाचे पारडे जड असले तरी कोलंबियाचा संघ धसमुसळ्या खेळासाठी प्रसिद्ध आहे. उरुग्वेविरुद्धच्या सामन्यात त्यांनी मर्यादा ओलांडल्या होत्या. त्यांचे प्रशिक्षक नेस्टॉर लॉरेन्झो यांनी उपांत्य फेरीच्या त्या सामन्यात राखीव खेळाडू खेळवण्याची संख्या मर्यादित ठेवली होती. रॉड्रिगेझला तर त्यांनी ६२व्या मिनिटाला मैदानात आणले होते. अर्जेंटिनाचा संघ हा पारंपरिक खेळ करणारा संघ आहे. उद्याच्या सामन्यात कोलंबियाचे खेळाडू निश्चितच मेस्सीला टार्गेट करण्याचा प्रयत्न करतील, त्यामुळे इतर खेळाडूंसाठी गोल करण्याचा मार्गही तयार होऊ शकतो.

अर्जेंटिना-कोलंबिया आमने-सामने

एकूण लढती ४३

विजय ः अर्जेंटिना २५

कोलंबिया ९

अनिर्णित ः ९