T20 World Cup 2024 Final, India vs South Africa: भारतीय क्रिकेट संघाने शनिवारी टी२० वर्ल्ड कप २०२४ स्पर्धेच्या विजेतेपदाला गवसणी घातली. अंतिम सामन्यात रोहित शर्माच्या नेतृत्वातील भारतीय संघाने दक्षिण आफ्रिकेला ७ धावांनी पराभूत केले आणि दुसऱ्यांदा टी२० वर्ल्ड कपवर नाव कोरले.
मात्र, यामुळे दक्षिण आफ्रिकेचे पहिले वर्ल्ड कप विजेतेपदाचं स्वप्न भंगलं. अगदी विजयाच्या जवळ येऊनही दक्षिण आफ्रिका संघाला पराभवाचा सामना करावा लागल्याने त्यांचे खेळाडू निराश होते. त्यांनाही आपल्या डोळ्यातील अश्रु रोखणं कठीण झालं होतं.
मात्र, असं असलं तरी दक्षिण आफ्रिकेचा माजी क्रिकेटपटू एबी डिव्हिलियर्सने संघाला धीर देत मान ताठ ठेवा, असा संदेश दिला आहे.
अंतिम सामन्यानंतर डिव्हिलियर्सने ट्वीट केले की "मान ताठ ठेवा, तुम्ही कोणत्याही दक्षिण आफ्रिका संघापेक्षा पुढे गेला आहात. तुम्ही सर्व हिरो आहात. अजूनही सर्वोत्तम येणं बाकी आहे. भारताचं अभिनंदन."
खरंतर दक्षिण आफ्रिका संघाने यंदा पहिल्यांदाच वरिष्ठ पातळीवर पुरुषांच्या कोणत्याही वर्ल्ड कपमध्ये अंतिम सामना गाठण्याचा पराक्रम केला होता. यापूर्वी कधीही दक्षिण आफ्रिका संघ वर्ल्ड कपचा अंतिम सामना खेळला नव्हता. त्यामुळेच डिव्हिलियर्सने याबद्दल संघाला आठवण करून देत त्यांना धीर दिला आहे.
या सामन्यात भारताने दक्षिण आफ्रिकेसमोर १७७ धावांचे लक्ष्य ठेवले होते. या लक्ष्याचा पाठलाग करताना हेन्रिक क्लासेनने २७ चेंडूत ५२ धावांची खेळी केली. या खेळीत त्याने २ चौकार आणि ५ षटकार मारले.
तसेच क्विंटन डी कॉकने ३९ आणि ट्रिस्टन स्टब्सने ३१ धावांची खेळी केली. याशिवाय डेव्हिड मिलरनेही १७ चेंडूत २१ धावा केल्या. मात्र, त्यांना विजय मिळवून देता आला नाही. दक्षिण आफ्रिका संघाला २० षटकात ८ बाद १६९ धावाच करता आल्या.
भारताकडून गोलंदाजीत हार्दिक पांड्याने ३ विकेट्स घेतल्या, तर आर्शदीप सिंग आणि जसप्रीत बुमराह यांनी प्रत्येकी २ विकेट्स घेतल्या. अक्षर पटेलने १ विकेट घेतली.
तत्पु्र्वी, भारताने २० षटकात ७ बाद १७६ धावा केल्या होत्या. भारताकडून विराट कोहलीने ५९ चेंडू ७६ धावांची खेळी केली. तसेच अक्षर पटेलने ४७ धावा केल्या. शिवम दुबेने २७ धावांची खेळी केली.
दक्षिण आफ्रिकेकडून केशव महाराज आणि एन्रिक नॉर्किया यांनी प्रत्येकी २ विकेट्स घेतल्या, तर मार्को यान्सिन आणि कागिसो रबाडा यांनी प्रत्येकी १ विकेट घेतली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
