Afg vs Ban : अफगाणिस्तानकडे इतिहास रचण्याची संधी? सेमी-फायनलमध्ये जाण्यासाठी बांगलादेशशी लढणार

Afghanistan vs Bangladesh T20 World Cup 2024 : माजी विजेत्या ऑस्ट्रेलियावर सनसनाटी विजय मिळवल्यानंतर अफगाणिस्तानकडे इतिहास रचण्याची संधी असणार आहे. अफगाणिस्तानचा संघ टी-२० विश्करंडकातील सुपर आठ फेरीतील अखेरचा सामना आज (ता. २५) बांगलादेशशी खेळणार आहे.

या लढतीआधी भारत-ऑस्ट्रेलिया यांच्यामधील लढत सोमवारी पार पडेल. या लढतीवर अफगाणिस्तानचे या स्पर्धेतील भवितव्य अवलंबून असणार आहे. अफगाणिस्तानचा संघ उपांत्य फेरीत पोहोचल्यास प्रतिष्ठेच्या स्पर्धेची अंतिम चार फेरी गाठण्याची त्यांची पहिलीच खेप असणार आहे.

टी-२० विश्‍वकरंडकातील गट एकमध्ये भारत, ऑस्ट्रेलिया व अफगाणिस्तान यांच्यातील दोन संघ उपांत्य फेरीत पोहोचणार आहेत. भारतीय संघाचा नेट रनरेट सर्वात चांगला आहे. त्यामुळे भारतीय संघाचा उपांत्य फेरीतील प्रवेश पक्का आहे, पण ऑस्ट्रेलिया व अफगाणिस्तान यांच्यामध्ये रस्सीखेच लागली आहे. एका स्थानासाठी दोन संघांमध्ये चढाओढ लागली आहे. गट दोनमधून दक्षिण आफ्रिका व इंग्लंड हे दोन संघ उपांत्य फेरीत पोहोचले आहेत. अफगाणिस्तान-बांगलादेश यांच्यामधील लढतीच्या निकालानंतर गट एकमधील चित्र स्पष्ट होणार आहे.