Video : पाक चाहत्याशी भिडला होता शमी, कॅप्टन कूल धोनीनं केली होती मध्यस्थी

Support to Mohammed Shami : भारत आणि पाकिस्तान यांच्यातील हायहोल्टेज लढतीनंतर माथेफिरी वृत्तीच्या नेटकऱ्यांनी भारताचा प्रमुख गोलंदाज असलेल्या मोहम्मद शमीला टार्गेट केलं. टी-20 वर्ल्ड कप स्पर्धेतील सलामीच्या लढतीत टीम इंडियाला सलामीच्या सामन्यात मोठ्या पराभवाचा सामना करावा लागला. याचा सर्व राग एकट्यावर काढला गेला. त्यामुळे ट्विटरवर मोहम्मद शमी चांगलाच ट्रेंडमध्ये दिसला.

सोशल मीडियाच्या माध्यमातून मोहम्मद शमीला टार्गेट करणाऱ्यांना अनेक दिग्गजांनी उत्तर दिले. आम्ही शमीच्या पाठिशी आहोत, असे सांगत क्रिकेटच्या देवासह मुल्तानचा सुल्तान विरेंद्र सेहवागने शमीच्या बाजूनं तुफान बॅटिंग करत नेटकऱ्यांना सुनावलं. सोशल मीडियाच्या माध्यमातून शमीवर फिक्सिंगचा आरोप करणाऱ्यांना कदाचित अनेक गोष्टींचा विसर पडल्याचे दिसले. त्यातीलच एक गोष्ट म्हणजे चॅम्पियन्स ट्रॉफी फायनलमधील पराभवानंतरचा शमीचा तो आक्रमक अंदाज.

2017 मध्ये भारत आणि पाकिस्तान यांच्यात मिनी वर्ल्ड कप समजल्या जाणाऱ्या चॅम्पियन्स ट्रॉफीची फायलन रंगली होती. लंडनच्या ओव्हल मैदानात पाकिस्तान संघाने पहिल्यांदा बॅटिंगकरताना 338 धावांचा डोंगर उभारला होता. याचा पाठलाग करताना विराट कोहलीच्या नेतृत्वाखाली टीम इंडियाचा संघ 158 धावांवर आटोपला होता. या सामन्यातील मोठ्या पराभवानंतर खांदे पाडून ड्रेसिंग रुममध्ये जात असताना काही पाकिस्तानी चाहत्यांनी 'बाप...कौन है कळलं का?... अशा भाषेत भारतीय संघातील खेळाडूंना डिवचण्याचा प्रकार केला होता. यावेळी मोहम्मद शमी त्या पाकिस्तानी चाहत्याला नडला होता. यावेळी धोनीने मध्यस्थी करत वाद मिटवून शमीला घेऊन गेल्याचे पाहायला मिळाले होते.

आयसीसी चॅम्पियनशिप फायनल लढतीत मोहम्मद शमी टीम इंडियाच्या प्लेइंग इलेव्हनचा भाग नव्हता. मात्र तरीही आपल्या संघातील सहकाऱ्यांना उद्देशून पाकिस्तानी चाहत्याने उच्चारलेल्या शब्दांमुळे त्याचा राग अनावर झाला होता. टीम इंडिया आणि सहकाऱ्यांसदर्भातील प्रेमाची आणि आदराची भावनाच मोहम्मद शमीने यावेळी दाखवून दिले होते.