T20 WC: रोहित शर्माबद्दल केविन पीटरसनची मोठी भविष्यवाणी

Rohit Sharma in T20 World Cup: पाकिस्तानकडून (Pakistan) मोठा पराभव स्वीकारल्यानंतर भारतीय संघ (Team India) या रविवारी न्यूझीलंडशी (New Zealand) खेळणार आहे. न्यूझीलंड संघाचा पहिला सामना पाकिस्तान झाला असून तेदेखील पराभूत झाले. त्यामुळे भारत-न्यूझीलंड सामन्याकडे साऱ्यांचे लक्ष आहे. भारताचा धडाकेबाज सलामीवीर रोहित शर्मा (Rohit Sharma) हा IPL मध्ये चांगल्या फॉर्मात होता. पण पाकिस्तानविरूद्ध तो पहिल्याच चेंडूवर पायचीत झाला. भोपळाही न फोडता आलेल्या रोहित शर्माबद्दल इंग्लंडचा माजी कर्णधार केविन पीटरसन याने एक भविष्यवाणी केली.

केविन पीटरसन याने IPL मध्ये रोहितचा खेळ पाहिला. त्यामुळेच त्याने रोहितबद्दल महत्त्वाचं विधान केलं. रोहित शर्मा हा कोणत्याही परिस्थितीत आणि कोणत्याही फॉरमॅटमध्ये सर्वोत्तम फलंदाजी करणारा खेळाडू आहे. गेल्या काही दिवसांमध्ये तो ज्या प्रकारे खेळतो आहे, त्यावरून तो टी२० वर्ल्ड कपमध्ये फलंदाजीत अयशस्वी ठरेल असं वाटत नाही. डावाच्या सुरूवातीला फलंदाजी करणं हे खूपच मनोरंजक असतं हे साऱ्यांनाच माहिती आहे. त्यामुळे मला विश्वास आहे की रोहित माझं म्हणणं खरं करेल. यंदाच्या वर्ल्ड कपमध्ये तो सर्वाधिक धावा करणारा खेळाडू ठरेल, अशी भविष्यवाणी पीटरसन याने केली.

"शाहीन शाह आफ्रिदी हा अतिशय प्रतिभावान खेळाडू आहे. त्याच्या भरवशावरच मी म्हणू शकतो की पाकिस्तानचा संघ यंदाच्या वर्ल्ड कपमध्ये चांगली कामगिरी करू शकेल. नव्या चेंडूचा तो स्विंगसाठी खूप सुंदर वापर करतो. मला असं वाटतं की तो प्रत्येक संघाचे सलामीवीर स्वस्तात माघारी पाठवेल आणि संपूर्ण स्पर्धेत सर्वाधिक बळी टिपेल", असं पीटरसन म्हणाला. तसेच, IPL च्या नुकत्याच पार पडलेल्या हंगामात दमदार कामगिरी करणाऱ्या ऑस्ट्रेलियाच्या ग्लेन मॅक्सवेलबद्दलही पीटरसनने मत मांडलं. मॅक्सवेल हा यंदाच्या टी२० वर्ल्ड कपमध्ये सर्वोत्तम खेळाडूचा किताब पटकावेल. त्याने युएईच्या मैदानांवर खूप चांगली कामगिरी केली आहे. त्याचा फायदा करून घेत तो संघाला यशस्वी करेल, असं केविन पीटरसन म्हणाला.