T-20 Womens Series : टी-२० विश्‍वकरंडक, आशियाई स्पर्धेची तयारी; भारत-दक्षिण आफ्रिका यांच्यामध्ये पहिली टी-२० लढत

चेन्नई - भारत-दक्षिण आफ्रिका यांच्यामध्ये उद्यापासून तीन सामन्यांच्या टी-२० मालिकेला सुरुवात होणार आहे. आगामी आशियाई करंडक व टी-२० विश्‍वकरंडक या दोन महत्त्वाच्या स्पर्धांची रंगीत तालीम म्हणून या मालिकेकडे बघितले जात आहे.

हरमनप्रीत कौरच्या नेतृत्वात भारतीय महिला संघाने तीन एकदिवसीय सामन्यांच्या मालिकेत ३-० असे निर्भेळ यश संपादन केले. त्यानंतर एकमेव कसोटी सामनाही आपल्या नावावर केला. त्यामुळे साहजिकच टी-२० मालिकेतही वर्चस्व राखण्यासाठी भारतीय संघ प्रयत्न करताना दिसणार आहे.

भारतीय संघाची उपकर्णधार स्मृती मानधना हिने एकदिवसीय मालिकेत दोन शतके व एक अर्धशतक झळकावताना आपण दमदार फॉर्ममध्ये असल्याचे दाखवून दिले. हरमनप्रीत हिनेही अखेरच्या एकदिवसीय सामन्यात धडाकेबाज शतक झळकावले.

शेफाली वर्मा हिला एकदिवसीय मालिकेत सूर गवसला नाही; पण कसोटीत तिने खणखणीत द्विशतक झळकावले. जेमिमा रॉड्रिग्ज व रिचा घोषा या खेळाडूंकडूनही छान खेळी झालेल्या आहेत. एकूणच काय तर भारतीय संघातील अव्वल पाच फलंदाज फॉर्ममध्ये आहेत.

गोलंदाजही सरस

भारतीय संघाने गोलंदाजी विभागातही ठसा उमटवला आहे. रेणुका सिंग, पूजा वस्त्रकार, अरुंधती रेड्डी यांनी चमक दाखवली आहे. दीप्ती शर्मा हिने अष्टपैलू कामगिरी बजावताना भारतीय संघासाठी मोलाची कामगिरी केली आहे. राधा यादव, आशा शोभना व श्रेयांका पाटील या गोलंदाजही प्रतिस्पर्ध्यांवर वर्चस्व गाजवत आहेत. भारतीय संघ फलंदाजी व गोलंदाजी या दोन्ही बाबींमध्ये सरस असल्यामुळे टी-२० मालिकेतही दक्षिण आफ्रिकन संघ दबावाखाली राहील, यात शंका नाही.

कर्णधारावर मदार

दक्षिण आफ्रिकन संघाची मदार कर्णधार लॉरा वॉलवॉर्ड्‌ट हिच्या एकटीच्या खेळावर अवलंबून आहे; पण संघातील इतर खेळाडूंनीही दबावाखाली खेळ उंचवायला हवा. मेरीझन कॅप, सून लूस, ॲनेक बॉच, ताझमिन ब्रिट्‌स यांनीही दमदार खेळ करायला हवा.

तीन सामन्यांची टी-२० मालिका

पहिला सामना - ५ जुलै

दुसरा सामना - ७ जुलै

तिसरा सामना - ९ जुलै

(तीनही सामने संध्याकाळी सात वाजता सुरू होतील.)