IND vs SA : शिवम दुबेचा पत्ता कट, ओपनर बदलणार? फायनलमध्ये आफ्रिकेविरुद्ध 'ही' असणार टीम इंडियाची प्लेइंग-11

T20 World Cup 2024 Final India Playing 11 : भारतीय संघ टी-20 वर्ल्ड कप 2024 चा अंतिम सामना आज शनिवार 29 जून रोजी दक्षिण आफ्रिकेविरुद्ध खेळणार आहे. गेल्या तीन सामन्यांमध्ये रोहित शर्माच्या नेतृत्वाखाली टीम इंडियाच्या प्लेइंग इलेव्हनमध्ये कोणताही बदल झालेला नाही.

अफगाणिस्तानविरुद्ध खेळल्या गेलेल्या सुपर-8 च्या पहिल्या सामन्यात रोहितने संघाच्या प्लेइंग इलेव्हनमध्ये शेवटचा बदल केला होता, ज्यामध्ये मोहम्मद सिराजच्या जागी कुलदीप यादव आला होता. आता विजेतेपदाच्या लढतीत शिवम दुबेच्या रूपाने टीम इंडियाच्या प्लेइंग इलेव्हनमध्ये मोठा बदल होऊ शकतो.

दक्षिण आफ्रिकेविरुद्धच्या फायनलमध्ये टीम इंडियाच्या बदलामुळे सलामीच्या जोडीमध्येही फेरबदल होऊ शकतात. खरंतर, अंतिम सामन्यासाठी कर्णधार रोहित शर्मा शिवम दुबेला भारताच्या प्लेइंग इलेव्हनमधून वगळू शकतो. वर्ल्ड कपच्या पहिल्या सामन्यापासून दुबे प्लेइंग इलेव्हनचा भाग आहे.

अष्टपैलू दुबे आतापर्यंत फक्त फलंदाज म्हणून खेळला आहे. अमेरिकेविरुद्धच्या सामन्यात त्याने फक्त 1 षटक टाकले. तर दुबेला फलंदाजीत फारशी छाप सोडता आलेली नाही. त्याने फिरकीपटूंविरुद्ध काही मोठे फटके नक्कीच मारले आहेत, पण वेगवान गोलंदाजांसमोरही तो असहाय्य दिसत आहे.

दुबेचा खराब फॉर्म लक्षात घेता यशस्वी जैस्वालला अंतिम फेरीत संधी मिळू शकते. या टी-20 वर्ल्ड कपमध्ये जैस्वालने आतापर्यंत एकही सामना खेळलेला नाही. जैस्वाल प्लेइंग इलेव्हनमध्ये आला झाला तर तो रोहित शर्मासोबत सलामी करू शकतो. तर आतापर्यंत ओपनिंग करणारा विराट कोहली आपल्या जुन्या तीन नंबरवर परत येऊ शकतो. आता अंतिम सामन्यासाठी रोहित शर्मा प्लेइंग इलेव्हनमध्ये बदल करतो की नाही हे पाहणे उत्सुकतेचे ठरणार आहे.

टी-20 वर्ल्ड कप 2024 फायनलमध्ये भारताची संभाव्य प्लेइंग इलेव्हन : रोहित शर्मा (कर्णधार), यशस्वी जैस्वाल, विराट कोहली, ऋषभ पंत (यष्टीरक्षक), सूर्यकुमार यादव, हार्दिक पांड्या, रवींद्र जडेजा, अक्षर पटेल, कुलदीप यादव, अर्शदीप सिंग, जसप्रीत बुमराह.