T20 World Cup: सूर्यानं ज्या कॅचनं वर्ल्ड कप जिंकवला, त्याचा ड्रेसिंग रुममध्ये जय शाह यांच्याकडून खास सन्मान, पाहा Video

Fielding Medal: टी२० वर्ल्ड कप २०२४ स्पर्धेत भारतीय संघाने शेवटपर्यंत अपराजित राहत विजेतेपदाला गवसणी घातली. शनिवारी बार्बाडोसला झालेल्या अंतिम सामन्यात भारतीय संघाने दक्षिण आफ्रिकेला ७ धावांनी पराभूत केले. या विजयानंतर भारतीय संघातील खेळाडूंना विजेत्यांचे मेडल देण्यात आले.

या सामन्यानंतर प्रथेप्रमाणे भारतीय संघाच्या ड्रेसिंग रुममध्ये सर्वोत्तम क्षेत्ररक्षकाला फिल्डिंग मेडल देण्यात आले. सामना संपल्यानंतर भारताच्या ड्रेसिंग रुममध्ये सर्वजण जल्लोष करत होते. यावेळी भारताचे क्षेत्ररक्षक प्रशिक्षक टी दिलीप यांनी खेळाडूंचं कौतुक केलं.

तसेच त्यांनी सांगितलं की यावेळी फिल्डिंग मेडल देण्यासाठी बीसीसीआयचे सचिव जय शाह उपस्थित आहे. दरम्यान, यावेळी या मेडलसाठी उमेदारांची घोषणा न करताच सूर्यकुमार यादवला य मेडलचा मानकरी म्हणून घोषित करण्यात आलं.

जय शाह यांनी त्याच्या गळ्यात ते मेडल घातलं. यानंतर सूर्यकुमारने दिलीप यांचे आणि जय शहा यांचे आभार मानले. या क्षणांचा व्हिडिओ बीसीसीआयने सोशल मीडियावर शेअर केला आहे.

सूर्याने या सामन्यात अखेरच्या षटकात जेव्हा दक्षिण आफ्रिकेला १६ धावांची गरज होती, तेव्हा हार्दिकच्या गोलंदाजीवर पहिल्याच चेंडूवर डेव्हिड मिलरचा बाऊंड्री लाईनवर महत्त्वाचा झेल घेतला होता. हा झेल सामना पलटवणारा ठरला.

जर हा झेल त्याने घेतला नसता, तर तो षटकार गेला असला आणि निकाल भारताच्या विरुद्धही लागू शकला असता. त्याचमुळे त्याचा हा झेल महत्त्वाचा होता.

या सामन्यात भारताने २० षटकात ७ बाद १७६ धावा केल्या होत्या आणि दक्षिण आफ्रिकेसमोर १७७ धावांचे लक्ष्य ठेवले होते.या लक्ष्याचा पाठलाग करताना दक्षिण आफ्रिकेला २० षटकात ८ बाद १६९ धावाच करता आल्या.