Ranji Trophy, Jammu and Kashmir vs Odisha: भारतात सध्या रणजी ट्ऱॉफी २०२४ स्पर्धा सुरू असून दुसऱ्या फेरीत जम्मू-काश्मीर आणि ओडिशा संघात सामना सुरू आहे. हा सामना २२ वर्षीय अब्दुल समदने दोन शतकं करत गाजवला आहे. त्याने यासह एका मोठ्या विक्रमालाही गवसणी घातली आहे. कटकमधील बाराबाती स्टेडियमवर हा सामना होत आहे.
पहिल्या डावात समद चौथ्या क्रमांकावर फलंदाजीला उतरला. यावेळी त्याने आक्रमक खेळी करताना ११७ चेंडूत १२७ धावांची खेळी केली. या खेळीत त्याने ६ चौकार आणि ९ षटकार मारले.
त्याचबरोबर दुसऱ्या डावातही समदने चौथ्या क्रमांकावर खेळताना आक्रमकच फलंदाजी केली. त्याने दुसऱ्या डावात १०८ चेंडूत ५ चौकार आणि ६ षटकारांसह नाबाद १०८ धावांची खेळी केली. त्यामुळे समद एकाच रणजी ट्रॉफी सामन्यात दोन शतके करणारा जम्मू-काश्मीर संघाचा पहिलाच खेळाडू ठरला आहे.