दिल्ली : कर्णधार मेग लॅनिंग (५३ धावा) व जेमिमा रॉड्रिग्ज (नाबाद ६९ धावा) यांच्या धडाकेबाज अर्धशतकी खेळींच्या जोरावर दिल्ली कॅपिटल्स संघाने मंगळवारी पार पडलेल्या महिला प्रीमियर लीगमधील लढतीत गतविजेत्या मुंबई इंडियन्सवर २९ धावांनी मात केली. दिल्लीचा हा चौथा विजय ठरला. या विजयासह त्यांनी गुणतालिकेत पहिल्या स्थानावर झेप घेतली. या पराभवामुळे मुंबईचा संघ दुसऱ्यावरून तिसऱ्या स्थानावर आला. मुंबईचा हा दुसरा पराभव ठरला.
दिल्लीकडून मिळालेल्या १९३ धावांच्या आव्हानाचा पाठलाग करणाऱ्या मुंबईला ८ बाद १६३ धावसंख्येपर्यंत मजल मारता आली. हेली मॅथ्यूज (२९ धावा), अमनज्योत कौर (४२ धावा), सजीवन सजना (नाबाद २४ धावा) यांच्याकडून थोडीफार झुंज मिळाली. यास्तिका भाटीया (६ धावा), नॅट सिव्हर (५ धावा), हरमनप्रीत कौर (६ धावा), अमेलिया केर (१७ धावा) या प्रमुख फलंदाजांना अपयश आले. त्यामुळे मुंबईचा पराभव झाला. जेस जोनासेन हिने २१ धावा देत तीन फलंदाजांना पॅव्हेलियनमध्ये पाठवले.
त्याआधी मुंबईने नाणेफेक जिंकून प्रथम क्षेत्ररक्षण करण्याचा निर्णय घेतला. मेग लॅनिंग हिने ३८ चेंडूंमध्ये ६ चौकार व २ षटकारांसह ५३ धावांची खेळी केली. शेफाली वर्माने २८ धावांची, तर एलिस कॅप्सीने १९ धावांची खेळी केली. जेमिमा रॉड्रिग्ज हिने अवघ्या ३३ चेंडूंमध्ये ८ चौकार व ३ षटकारांसह नाबाद ६९ धावांची फटकेबाजी केली. दिल्लीने २० षटकांत ४ बाद १९२ धावा फटकावल्या.
संक्षिप्त धावफलक : दिल्ली कॅपिटल्स २० षटकांत ४ बाद १९२ धावा (मेग लॅनिंग ५३, शेफाली वर्मा २८, एलिस कॅप्सी १९, जेमिमा रॉड्रिग्ज नाबाद ६९, पूजा वस्त्रकार १/२०) विजयी वि. मुंबई इंडियन्स २० षटकांत ८ बाद १६३ धावा (हेली मॅथ्यूज २९, अमनज्योत कौर ४२, सजीवन सजना नाबाद २४, जेस जोनासन ३/२१).
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
