Ruturaj Gaikwad ची भारी कॅप्टन्सी! श्रेयसच्या संघाला पाजले पाणी, पण Axar Patelची चिवट खेळी

Duleep Trophy 2024 Ruturaj Gaikwad: दुलीप करंडक स्पर्धेत आज ऋतुराज गायकवाडने त्याच्या कॅप्टन्सीची झलक दाखवून दिली. भारत क संघाचे नेतृत्व सांभाळणाऱ्या ऋतुराजने भारत ड संघाचे कंबरडे मोडले. ऋतुराजच्या डावपेचासमोर श्रेयस अय्यरच्या भारत ड संघाचा डाव १६४ धावांवर गडगडला. ६ बाद ४८ अशा अडचणीत सापडलेल्या भारत ड संघासाठी अक्षर पटेल ( Axar Patel) धावून आला. त्याच्या ८६ धावांनी भारत ड संघाला आधार दिला.

अथर्व तायडे ( ४) व यश दुबे ( १०) या जोडीला अंकुश कंबोजने धक्का दिला. कर्णधार श्रेयस व देवदत्त पड्डिकल दम दाखवतील असे वाटले होते, परंतु वैशाक विजयकुमारने दोघांचा अडथळा दूर केला. श्रेयस ९ धावांवर बाद झाला आणि पड्डिकल भोपळ्यावर माघारी परतला. हिमांशू चव्हाणने भारत ड संघाला पाचवा धक्का देताना रिकी भूईला ( ४) माघारी पाठवले.

केएस भरत ( १३) व अक्षर पटेल यांनी खिंड लढवली. एम सुतारने ही जोडी तोडली. सारांश जैन (१३) व अर्शदीप सिंग ( १३) यांनी अक्षरला साथ दिली. अक्षर पटेल मैदानावर उभा राहिला आणि त्याने ११८ चेंडूंत ६ चौकार व ६ षटकारांसह ८६ धावांची खेळी केली. भारत ड संघाचा पहिला डाव ४८.३ षटकांत १६४ धावांवर गडगडला. भारत क संघाला ११ धावांवर पहिला धक्का बसला, साई सुदर्शन ( ७) हर्षित राणाच्या गोलंदाजीवर बाद झाला.

दरम्यान, भारत अ आणि भारत ब सामन्यात मुशीर खानच्या अर्धशतकाच्या जोरावर भारत ब ने ७ बाद १२८ धावा केल्या आहेत. प्रथम फलंदाजीला आलेल्या भारत ब संघाला यशस्वी जैस्वाल ( ३०) व कर्णधार अभिमन्यू इश्वरन ( १३) यांनी चांगली सुरूवात करून दिली होती. आवेश खानने पहिला धक्का दिला. सर्फराज खानही ९ धावा करून आवेशच्या गोलंदाजीवर पायचीत झाला. ५९ चेंडूंत ६ चौकारांसह ३० धावा करणाऱ्या ऋषभला खलिल अहमदने माघारी पाठवले.