१२ चौकार, ३ षटकार! Sanju Samson चे खणखणीत शतक; श्रेयस अय्यरच्या संघाला सावरले

Duleep Trophy 2024 Sanju Samson century : संजू सॅमसनने दुलीप ट्रॉफी २०२४ मध्ये आज भारत ड संघाकडून शतक झळकावले आहे. कर्णधार श्रेयस अय्यर पुन्हा अपयशी ठरला आणि भारत ब संघाविरुद्ध खेळताना तो शून्यावरच बाद झाला. दुलीप ट्रॉफीत त्याच्या बॅटमधून ९, ५४, ०, ४१ आणि ० अशाच धावा निघाल्या. भारत ड संघाचे या स्पर्धेतील जेतेपदाचे आव्हान संपुष्टात आले आहे.

भारत ड संघाने पहिल्या दिवसअखेरीस पाच बाद ३०६ धावा केल्या होत्या. देवदत्त पडिक्कल (५० धावा), के. एस. भारत (५२ धावा), रिकी भुई (५६ धावा) व संजू सॅमसन (नाबाद ८९ धावा) यांनी भारत ड संघाकडून अर्धशतकी खेळी करताना भारत ब संघाविरुद्ध आपली चमक दाखवली.

भारत ब संघाने नाणेफेक जिंकून प्रथम क्षेत्ररक्षण स्वीकारले. देवदत्त पडिक्कल व श्रीकर भारत या भारत ड संघाच्या सलामी जोडीने १०५ धावांची भागीदारी करताना दमदार सुरुवात केली. नवदीप सैनीने देवदत्तला ५० धावांवर, तर मुकेशकुमारने के. एस. भारतला ५२ धावांवर बाद केले. रिकी भुई व निशांत सिंधू या जोडीने डाव सावरण्याचा प्रयत्न केला; पण फिरकी गोलंदाज राहुल चहर याने निशांत (१९ धावा), रिकी (५६ धावा) व श्रेयस अय्यर (०) यांना झटपट पॅव्हेलियनमध्ये पाठवत भारत ब संघासाठी मौल्यवान कामगिरी बजावली.

श्रेयस अय्यरप्रमाणे संजू सॅमसनसाठीही दुलीप ट्रॉफीतील कामगिरी महत्त्वाची आहे. त्याच्या बॅटमधूनही धावा निघत नव्हत्या; मात्र गुरुवारी त्याने ८३ चेंडूंमध्ये नाबाद ८९ धावांची फटकेबाजी केली. या खेळीमध्ये त्याने दहा चौकार व तीन षटकार मारले होते आणि आज त्या खेळीचे शतकात रुपांतर केले. त्याने १०१ चेंडूंत १२ चौकार व ३ षटकारांच्या मदतीने १०६ धावांची खेळी केली. संघाच्या ८ बाद ३३६ धावा झाल्या आहेत.