Duleep Trophy 2024: टीम इंडियात एन्ट्री घेऊ पाहणारा स्टार फलंदाज फेल, निम्मा संघ ३४ धावांत तंबूत; रोहितची चिंता वाढली

Duleep Trophy 2024 Shreyas Iyer : दुलीप करंडक स्पर्धेला आजपासून सुरुवात झाली. भारत अ विरुद्ध भारत ब आणि भारत क विरुद्ध भारत ड यांच्यात लढत सुरू आहेत. या स्पर्धेत भारतीय संघातील बरेच सीनियर्स खेळाडू खेळल आहेत आणि त्यामुळे या स्पर्धेवर चाहत्यांचे लक्ष लागून आहे. रवींद्र जडेजा, सूर्यकुमार यादव व इशान किशन यांनी या स्पर्धेतून माघार घेतली आहे. लोकेश राहुल, शुभमन गिल, श्रेयस अय्यर, ऋषभ पंत आदी खेळाडूंवर लक्ष असणार आहे. अशात भारताच्या मधल्या फळीतील स्टार फलंदाजाला अपयश आले आहे.

भारत क आणि भारत ड यांच्यातला सामन्यात पहिल्या तासाभरात धक्कादायक निकाल पाहायला मिळतोय.. ऋतुराज गायकवाडच्या नेतृत्वाखाली खेळणाऱ्या भारत क संघाने नाणेफेक जिंकून गोलंदाजीचा निर्णय घेतला. श्रेयस अय्यरच्या नेतृत्वाखाली भारत ड संघ खेळतोय आणि प्रथम फलंदाजीला आलेल्या संघाची अवस्था ५ बाद ३४ अशी दयनीय झाली आहे.

अथर्व तायडे व यश दुबे ही जोडी सलामीला आली. पण, अंकुश कंबोजने पहिल्या सहा षटकांत दोघांनाही माघारी पाठवले. तायडे ४ व दुबे १० धावांवर बाद झाला. त्यानंतर कर्णधार श्रेयस अय्यर व देवदत्त पड्डिकल दम दाखवतील असे वाटले होते, परंतु वैशाक विजयकुमारने दोघांचा अडथळा दूर केला. श्रेयस ९ धावांवर बाद झाला आणि पड्डिकल भोपळ्यावर माघारी परतला. हिमांशू चव्हाणने भारत ड संघाला पाचवा धक्का देताना रिकी भूईला ( ४) माघारी पाठवले. Ks Bharat आणि अक्षर पटेल यांनी डाव सावरलेला दिसतोय..

श्रेयसचे अपयश रोहितसाठी डोकेदुखी...

श्रेयस अय्यर हा फेब्रुवारी २०२४ पासून कसोटी क्रिकेट खेळलेला नाही. तो भारताच्या मधल्या फळीतील प्रमुख फलंदाज आहे. तो भारतीय संघात पुनरागमन करण्यासाठी प्रयत्नशील आहे, परंतु त्याचे अपयश कर्णधार रोहित शर्माची डोकेदुखी वाढवणारे ठरू शकते. श्रेयसने १४ कसोटी सामन्यांत ३६.८६ च्या सरासरीने १ शतक व ५ अर्धशतकांसह ८११ धावा केल्या आहेत.