आग अन् किटाळ! भारतीय गोलंदाजाच्या वेगवान माऱ्याने स्टम्प्स उखडून फेकले; फलंदाज सैरभैर झाले, Video

Duleep Trophy 2024 Vijaykumar Vyshak : भारत-बांगलादेश यांच्यात पहिला कसोटी सामना चेन्नईत सुरू आहे. भारताच्या पहिल्या डावातील ३७६ धावांचा पाठलाग करताना बांगलादेशने ४० धावांत ५ फलंदाज गमावले आहेत. जसप्रीत बुमराह व आकाश दीप यांनी प्रत्येकी दोन विकेट्स घेतल्या, तर मोहम्मद सिराजनेही १ बळी टिपला. भारतीय गोलंदाज आंतरराष्ट्रीय कसोटी गाजवत असताना दुसरीकडे भारताचा विजयकुमार वैशाकने दुलीप ट्रॉफीत अफलातून कामगिरी केली आहे.

मयांक अग्रवालच्या नेतृत्वाखाली खेळणाऱ्या भारत अ संघाचा डाव २९७ धावांवर गुंडाळला गेला. प्रथम सिंग, मयांक, तिलक वर्मा व रियान पराग हे एकेरी धावेवर माघारी परतले. अंशूल कंबोजने दोन्ही सलामीवीरांना बाद केले. ५ बाद ३६ धावांवरून भारत अ संघाला शाश्वत रावतने सावरले. त्याने २५० चेंडूंत १५ चौकारांच्या मदतीने १२४ धावांची खेळी केली. शाम्स मुलानी ( ४४) व आवेश खान ( ५१*) यांनी चांगले योगदान दिले. एम प्रसिद्धने ३४ धावा केल्या. विजयकुमारने शतकवीर शाश्वत व प्रसिद्ध यांचे उडवलेले त्रिफळे चर्चेचा विषय ठरत आहेत. विजयकुमारने ५१ धावांत ४ विकेट्स घेतल्या.

भारत क संघाची सुरुवात काही खास झाली नाही. कर्णधार ऋतुराज गायकवाड ( १७) व बी साई सुदर्शन ( १७) यांना आकिब खानने चतुराईने बाद केले. रजत पाटीदारही भोपळ्यावर आकिबच्या गोलंदाजीवर माघारी परतला. आवेश खानने इशान किशनला ( ५) त्रिफळाचीत करून भारत क संघाची अवस्था ४ बाद ४१ अशी केली.

बाबा इंद्रजित आणि अभिषेक पोरेल यांनी संघाचा डाव सावरला आहे आणि भारत क संघाने २५ षटकांत ४ बाद ९१ धावा केल्या आहेत.