Duleep Trophy: सॅमसनच्या शतकाला कॅप्टन ईश्वरनचे शतकी प्रत्युत्तर; मुशीर खानसह सूर्यकुमारही अपयशी

Duleep Trophy India B vs India D: संजू सॅमसनच्या शतकी खेळीला भारत ब संघाचा कर्णधार अभिमन्यू ईश्वरननेही शतकी खेळीचे उत्तर दिले तरी त्याचा संघ दुलीप करंडक स्पर्धेत भारत ड संघाविरुद्ध मोठ्या पिछाडीवर आहे कारण भरवशाचे मुशीर खान आणि सूर्यकुमार यादव अपयशी ठरले आहेत.

संजू सॅमसनने शानदार १०६ धावांची खेळी केली. त्यामुळे भारत ड संघाने पहिल्या डावात ३४९ धावांपर्यंत मजल मारली. या तुलनेत भारत ब संघाची दुसऱ्या दिवस अखेर ६ बाद २१० अशी अवस्था झाली आहे. या धावसंखेत अभिमन्यू ईश्वरनचा वाटा ११६ धावांचा आहे.

दुलीप करंडक स्पर्धेच्या पहिल्या सामन्यात शानदार १८६ धावांची खेळी करणारा मुंबईचा मुशीर खान त्यानंतर दुसऱ्या सामन्यात अपयशी ठरला होता. आता तिसऱ्या लढतीतही तो केवळ एकेरी धावांत बाद झाला. तर पहिल्या दोन सामन्यांत दुखापतीमुळे खेळू न शकलेला सूर्यकुमार यादव प्रथमच खेळत आहे, परंतु तोही पाचच धावा करु शकला.

भारत ब संघाचा मधल्या फळीतील आणखी एक भरवशाचा फलंदाज नितीश कुमार रेड्डीला तर भोपळाही फोडता आला नाही. या तिन्ही फलंदाजांना अर्शदीप सिंगने बाद केले. दिवस अखेर वॉशिंग्टन सुंदर ३९ धावांवर किल्ला लढवत आहे.

तत्पुर्वी काल ८९ धावांवर नाबाद राहिलेल्या संजू सॅमसनने १०६ धावांची खेळी केली. यासाठी त्याने १०१ चेंडूंचाच सामना केला आणि त्यात १२ चौकार, ३ षटकार मारले.

संक्षिप्त धावफलक: भारत ड, पहिला डाव ः ३४९ (देवदत्त पडिक्कल ५०, श्रीकर भरत ५२, रिकी भुई ५६, संजू सॅमसन १०६, नवदीप सैनी १९.३-२-७४-५, राहुल चहर १३-१-६०-३).

भारत ब, पहिला डाव: ६ बाद २१० (अभिमन्यू ईस्वरन ११६, मुशीर खान ५, सूर्यकुमार यादव ५, वॉशिंग्टन सुंदर खेळत आहे ३९, अर्शदीप सिंग १२-४-३०-३, आदित्य ठाकरे १४-३-३३-२)