England Won Lords Test: इंग्लड क्रिकेट संघाने रविवारी श्रीलंकेविरुद्ध दुसऱ्या कसोटीत १९० धावांनी विजय मिळवला. लॉर्ड्सवर मिळवलेल्या या विजयासह इंग्लंडने तीन सामन्यांच्या कसोटी मालिकेत २-० अशी विजयी आघाडीही घेतली आहे. इंग्लंडच्या या विजयात गस ऍटकिन्सन आणि जो रुट यांचा मोठा वाटा राहिला.
या सामन्यात श्रीलंकेसमोर दुसऱ्या डावात इंग्लंडने ४८३ धावांचे लक्ष्य ठेवले होते. या लक्ष्याचा पाठलाग करताना श्रीलंकेला ८६.४ षटकात सर्वबाद २९२ धावांच करता आल्या. श्रीलंकेकडून दिनेश चंदिमलने ५८ धावांची खेळी केली, तर दिमुथ करुणारत्नेने ५५ आणि कर्णधार धनंजय डी सिल्वाने ५० धावांची खेळी केली.
तसेच मिलन रत्नायकनेही ९ व्या क्रमांकावर फलंदाजीला येत ४३ धावांची झुंज दिली. मात्र या डावातही श्रीलंकेला ऍटकिन्सन भारी पडला. त्याने ५ विकेट्स घेतल्या. तसेच ख्रिस वोक्सने २ विकेट्स आणि शोएब बशीरने १ विकेट घेतली.
