Border - Gavaskar Trophy: भारत आणि ऑस्ट्रेलिया यांच्यात होणारी बॉर्डर-गावसकर ट्रॉफी या कसोटी मालिकेची उत्सुकता नेहमीच चाहत्यांमध्ये दिसून येते. आता लवकरच बॉर्डर-गावसकर ट्रॉफी खेळली जाणार असल्याने त्याबाबत चर्चाही सुरू झाल्या आहेत.
बॉर्डर-गावसकर ट्रॉफी २०२४-२५ खेळण्यासाठी भारतीय संघ नोव्हेंबरमध्ये ऑस्ट्रेलिया दौऱ्यावर जाणार आहे. या दौऱ्यात भारताला ऑस्ट्रेलियाविरुद्ध ५ सामन्यांची कसोटी मालिका खेळायची आहे. या मालिकेला २२ नोव्हेंबरपासून सुरूवात होणार आहे. या मालिकेसाठी भारतीय संघाची घोषणाही झाली आहे. पण अद्याप ऑस्ट्रेलिया संघाची घोषणा करण्यात आली नाही.
या वर्षाच्या सुरुवातीच डेव्हिड वॉर्नरने आंतरराष्ट्रीय क्रिकेटमधून निवृत्ती घेतली होती. त्यामुळे ऑस्ट्रेलियाने उस्मान ख्वाजासोबत सलामीसाठी स्टीव्ह स्मिथचा पर्याय वापरून पाहिला. मात्र, सलामीला खेळताना स्मिथला फारसं यश मिळालं नाही.
