Rishabh Pant century India vs Bangladesh 1st Test Updates Marathi : शुभमन गिल आणि ऋषभ पंत ( Rishabh Pant) या जोडीने भारताला फ्रंट सीटवर बसवले आहे. ६३४ दिवसांनी कसोटी क्रिकेट खेळणाऱ्या ऋषभने अविश्वसनीय फटकेबाजी करून शतक झळकावले. या शतकासह ऋषभने MS Dhoni च्या विक्रमाशी बरोबरी केली. ऋषभ यापूर्वी कसोटीत ९० ते ९९ च्या दरम्यान ७ वेळा बाद झाला होता आणि त्यामुळे चाहते चिंतेत होते. पण, ऋषभने खणखणीत फटकेबाजी करून शुभमनच्या आधी शतक पूर्ण केले. डिसेंबर २०२२ मध्ये झालेल्या अपघातानंतर मैदानावर परतलेला ऋषभची ही पहिलीच कसोटी मॅच होती आणि त्यात त्याने शतक झळकावले.
भारताच्या ३७६ धावांच्या प्रत्युत्तरात बांगलादेशचा पहिला डाव १४९ धावांवर गुंडाळला गेला. भारतासाठी पहिल्या डावात आर अश्विन ( ११३) आणि रवींद्र जडेजा ( ८६) यांनी ७व्या विकेटसाठी १९९ धावा जोडल्या. यशस्वी जैस्वाल ( ५६) व ऋषभ पंत ( ३९) यांनी संघाला आधार दिला होता. भारताने पहिल्या डावात ३७६ धावा केल्या. बांगलादेशचा पहिला डाव १४९ धावांवर गुंडाळला. जसप्रीतने ४, सिराज, आकाश व रवींद्र जडेजा यांनी प्रत्येकी दोन विकेट्स घेतल्या.
दुसऱ्या डावातही रोहित शर्मा ( ५), विराट कोहली (१७) काही खास करू शकले नाही. यशस्वी १० धावा करून माघारी परतल्याने भारताला ६७ धावांत ३ धक्के बसले होते. पण, शुभमन गिल व ऋषभ पंत यांनी डाव सावरला. तिसऱ्या दिवशी गिलने दोन खणखणीत षटकार खेचून अर्धशतक पूर्ण केले. कसोटीच्या दुसऱ्या डावातील ही त्याची सलग चौथी 50+ धावांची खेळी ठरली. ऋषभनेही त्याचा ट्रेड मार्क वन हँड सिक्स खेचून अर्धशतक पूर्ण केले. या दोघांनी २७.४ षटकांत शतकी भागीदारी पूर्ण केली. त्यानंतर ऋषभने गिअर बदलला आणि शुभमनच्या आधी शतक पूर्ण केले.
महेंद्रसिंग धोनीने १४४ इनिंग्जमध्ये सहा शतकं झळकावली आहेत. ऋषभने कसोटीत ५८ इनिंग्जमध्ये सहा शतकांचा पराक्रम केला. ऋषभने १२४ चेंडूंत ११ चौकार व ४ षटकारांसह १०१ धावांची खेळी केली. पण, त्याला आणखी मोठी खेळी करता आली नाही. १२८ चेंडूंत १३ चौकार व ४ षटकारांसह तो १०९ धावांवर माघारी परतला. शुभमनसह त्याची २१७ चेंडूंत १६७ धावांची भागीदारीही संपुष्टात आली आणि भारताला २३४ धावांवर चौथा धक्का बसला. भारताकडे आता ४६१ धावांची आघाडी आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
