India vs New Zealand 3rd Test at Mumbai: भारत विरुद्ध न्यूझीलंड संघात कसोटी मालिकेतील तिसरा सामना शुक्रवापासून खेळला जात असून पहिल्याच दिवशी पाहुण्या संघाचा पहिला डाव संपला आहे. मुंबईतील वानखेडे स्टेडियमवर हा सामना होत असून या सामन्यात न्यूझीलंडने पहिल्या डावात ६५.४ षटकात सर्वबाद २३५ धावा केल्या.
भारताकडून पहिला दिवस रविंद्र जडेजा आणि वॉशिंग्टन सुंदर यांनी गाजवला. या दोघांनी मिळून ९ विकेट्स घेतल्या.
या सामन्यात न्यूझीलंडने नाणेफेक जिंकून प्रथम फलंदाजी करण्याचा निर्णय घेतल्याने भारतीय संघ गोलंदाजीसाठी उतरला. या सामन्यात सुरुवातीच्या काही षटकांतनंतर भारताच्या फिरकी गोलंदाजांचा बोलबाला दिसून आला.
वॉशिंग्टन सुंदर आणि रविंद्र जडेजा यांनी टिच्चून गोलंदाजी केली, ज्यांना आर अश्विनकडूनही साथ मिळाली. दरम्यान, भारताच्या फिरकी गोलंदाजांबरोबरच मुंबईच्या उष्णतेमुळेही न्यूझीलंडचे खेळाडू त्रासलेले दिसले.
