IND vs ZIM: झिम्बाब्वेविरुद्धच्या मालिकेसाठी भारतीय संघात मोठे बदल; BCCI ने ज्याच्यावर बंदी घातलेली, त्यालाच दिली संधी

India Squad for Zimbabwe Tour: टी20 वर्ल्ड कप 2024 स्पर्धा संपल्यानंतर आता युवा खेळाडूंचा समावेश असलेला भारतीय संघ झिम्बाब्वे दौऱ्यावर जाणार आहे. या दौऱ्यात भारतीय संघाला झिम्बाब्वेविरुद्ध 5 सामन्यांची टी20 मालिका खेळायची आहे.

या मालिकेसाठी भारताच्या निवड समितीने संघ घोषित केला आहे. मात्र, आता या मालिकेतील पहिल्या दोन सामन्यांसाठी मोठे बदल करण्यात आले आहेत. पहिल्या दोन सामन्यांसाठी साई सुदर्शन, जितेश शर्मा आणि हर्षित राणा यांना भारतीय संघात संधी देण्यात आली आहे.

त्यांना संजू सॅमसन, शिवम दुबे आणि यशस्वी जैस्वाल यांचे बदली खेळाडू म्हणून संधी दिली आहे.

सॅमसन, दुबे आणि जैस्वाल हे टी20 वर्ल्ड कप 2024 विजेत्या भारतीय संघाचा भाग होते. सध्या बार्बाडोसमध्ये चक्रीवादळाचा धोका असल्याने भारतीय संघ तिथेच अडकला आहे.

त्यामुळे सॅमसन, जैस्वाल आणि दुबेही भारतीय संघाबरोबर बार्बाडोसमध्ये आहेत. ते आता आधी भारतात येतील आणि त्यानंतर झिम्बाब्वे दौऱ्यातील शेवटच्या तीन टी20 सामन्यांसाठी रवाना होतील.

दरम्यान, यामुळे आता साई सुदर्शन आणि हर्षित राणा यांना आंतरराष्ट्रीय टी20 क्रिकेटमध्ये पदार्पणाची संधी असणार आहे. लक्षात घेण्यासारखी गोष्ट म्हणजे हर्षित राणावर आयपीएल 2024 दरम्यान बीसीसीआयने शिस्तभंगाबद्दल कठोर कारवाई केली होती. त्याला एका सामन्यासाठी बंदीही घातली होती.

असा असेल झिम्बाब्वे दौरा

भारतीय संघ झिम्बाब्वे दौऱ्यात 6 जुलैपासून टी20 मालिका खेळणार आहे. या मालिकेतील सामने जुलै महिन्यातील दिनांक 6, 7, 10, 13 आणि 14 या दिवशी टी20 सामने होणार आहेत. हे सर्व सामने हरारेला होणार असून भारतीय प्रमाणवेळेनुसार संध्याकाळी 4.30 वाजता चालू होतील.

पहिल्या दोन टी20 सामन्यासाठी असा आहे भारतीय संघ -

शुभमन गिल (कर्णधार), ऋतुराज गायकवाड, अभिषेक शर्मा, रिंकु सिंग, ध्रुव जुरेल (यष्टीरक्षक), रियान पराग, वॉशिंग्टन सुंदर, रवी बिश्नोई, आवेश खान, खलील अहमद, मुकेश कुमार, तुषार देशपांडे, साई सुदर्शन, जितेश शर्मा (यष्टीरक्षक), हर्षित राणा.