IND vs BAN 2nd Test: नाद खुळा...! Rohit Sharma ने एका हाताने टिपलेला अफलातून कॅच पाहिलात का? सारेच थक्क Video

India vs Bangladesh 2nd Test Marathi Updates: भारत-बांगलादेश यांच्यातल्या दुसऱ्या कसोटीची दोन दिवस पावसामुळे वाया गेली. अखेर आज चौथ्या दिवशी पावसाने विश्रांती घेतली आणि अखेर खेळ सुरू झाला. Jasprit Bumrah आणि मोहम्मद सिराज यांनी पहिल्या सत्रात बांगलादेशला धक्के दिले. सिराजच्या गोलंदाजीवर रोहित शर्माने ( Rohit Sharma Catch ) घेतलेला अविश्वसनीय झेल मन जिंकणारा ठरला.

भारताने नाणेफेक जिंकून बांगलादेशला प्रथम फलंदाजीसाठी बोलावले. आकाश दीपने बांगलादेशचे सलामीवीर जाकीर हसन ( ०) आणि शादमन इस्लाम ( २४) यांना माघारी पाठवले. मोमिनूल हक व कर्णधार नजमूल होसैन शांतो यांनी डाव सावरला होता. पण, आर अश्विनने ही जोडी तोडली. शांतोला त्याने ३१ धावांवर पायचीत केले. पहिल्या दिवसाचा खेळ ३ बाद १०७ धावांवर थांबवण्यात आला आणि त्यानंतर खेळ थेट चौथ्या दिवशी सुरू झाला.

कानपूरच्या ग्रीन पार्क स्टेडियमचीड्रेनेज सिस्टम चांगली नसल्याने दोन्ही दिवसाचा खेळ वाया गेला. पण, चौथ्या दिवसाचा खेळ सुरू झाला आणि बुमराहने पाचव्या षटकात मुश्फीकर रहिमचा ( ११) त्रिफळा उडवला. त्यानंतर सिराजने बांगलादेशचा पाचवा धक्का दिला. ३१ चेंडूंत १३ धावा करणारा लिटन दास झेलबाद झाला. रोहितने मिड ऑफला हवेत झेप घेत एका हाताने अफलातून कॅच घेतला. बांगलादेशचा निम्मा संघ १४८ धावांत तंबूत परतला आहे.

आर अश्विनच्या गोलंदाजीवर बांगलादेशला मोठा धक्का बसला. कसोटी क्रिकेटमधून निवृत्ती जाहीर करणारा शाकिब अल हसनचा हा शेवटचा सामना ठरू शकतो. त्यामुळे त्याच्याकडून मोठ्या खेळीची अपेक्षा होती. पण, तो १७ चेंडूंत ९ धावांवर माघारी परतला. यावेळी मोहम्मद सिराजने अफलातून झेल टिपला आणि बांगलादेशला १७० धावांवर सहावा धक्का बसला. भारतीय संघ आजच पाहुण्यांचा पहिला डाव गुंडाळण्याच्या तयारीत दिसतोय..