Kanpur Test वर आणखी एक संकट! IND vs BAN दुसरी कसोटी न होण्याची शक्यता बळावली; वाचा नेमकं काय घडलं

India vs Bangladesh 2nd Test : भारत-बांगलादेश यांच्यात कानपूर येथे होणाऱ्या कसोटीला हिंदू संघटनांचा विरोध होताना दिसतोय. बांगलादेशमध्ये झालेल्या हिंसाचारात हिंदूंवर झालेल्या अत्याचाराच्या निषेध म्हणून बांगलादेश मालिकेला विरोध आहे. त्यामुळे कानपूर कसोटीतील सुरक्षा वाढवण्यात आली आहे. त्यात आणखी एक संकट कसोटीवर ओढावलं आहे आणि त्यामुळे ही कसोटी होईल की नाही, अशी भीती व्यक्त होताना दिसतेय.

चेन्नई कसोटीत दणदणीत विजय मिळवल्यानंतर भारतीय संघ कानपूर येथे दाखल झाला. येथील ग्रीन पार्क स्टेडियमवर दुसरी कसोटी होणार आहे. २७ सप्टेबंरपासून सुरू होणाऱ्या कसोटीवर पावसाचे सावट आहे. कानपूर स्टेडियमची ड्रेनेज प्रणालीही चांगली नाही, त्यामुळे पाऊस पडल्यास खेळपट्टी सुकवण्यासाठी संपूर्ण दिवस खर्ची जाऊ शकतो. AccuWeather नुसार कानपूर कसोटीत मुसळधार पावसाचा अंदाज आहे.

कसोटीच्या पहिल्या दिवशी पाऊस पडण्याची शक्यता ९० टक्के आहे आणि दुसऱ्या दिवशीही पाऊस पडेल असा अंदाज ८० टक्के आहे. तिसऱ्या दिवशीही पावसाचा अंदाज असल्याने कसोटीचे पहिले तीन दिवस वाया जातील, असे सांगण्यात येत आहे. जागतिक कसोटी अजिंक्यपद स्पर्धेच्यादृष्टीने ही कसोटी रद्द होणे भारताला परवडणारे नाही.

भारतीय संघात कोणताच बदल नाही

दुसऱ्या कसोटीसाठी BCCI ने जाहीर केलेल्या संघात कोणताच बदल केलेला नाही. जसप्रीत बुमराहला या कसोटीसाठी विश्रांती दिली जाईल अशी शक्यता होती. कानपूरची खेळपट्टी पाहता भारतीय संघ तीन फिरकीपटूंसह मैदानावर उतरू शकतो. फिरकीपटूच्या तिसऱ्या जागेसाठी कुलदीप यादव व अक्षर पटेल यांच्यात स्पर्धा असेल.

दुसऱ्या कसोटीसाठी भारताचा संघ: रोहित शर्मा (कर्णधार), यशस्वी जैस्वाल, शुभमन गिल, विराट कोहली, लोकेश राहुल, सर्फराज खान, ऋषभ पंत, ध्रुव जुरेल, आर अश्विन, आर जडेजा, अक्षर पटेल , कुलदीप यादव , मोहम्मद सिराज, आकाश दीप, जसप्रीत बुमराह, यश दयाल.