IND vs SL : स्वॅग! गौतम गंभीर युगाची सुरुवात; पाहा टीम इंडियाचा मुंबई टू श्रीलंका प्रवास, Video

India tour Sri Lanka : ट्वेंटी-२० वर्ल्ड कप स्पर्धेनंतर भारतीय संघात स्थित्यंतर पाहायला मिळत आहे. रोहित शर्मा, विराट कोहली व रवींद्र जडेजा यांनी आंतरराष्ट्रीय ट्वेंटी-२०तून निवृत्ती जाहीर केली. राहुल द्रविड यांच्या यशस्वी कारकीर्दिनंतर मुख्य प्रशिक्षकपदाची जबाबदारी गौतम गंभीरच्या ( Gautam Gambhir Head Coach) खांद्यावर आली. आता खऱ्या अर्थाने गौतम गंभीर युगाची सुरूवात झालेली पाहायला मिळतेय. सूर्यकुमार यादव हा ट्वेंटी-२०चा नवा कर्णधार बनला, तर शुभमन गिलकडे वन डे व ट्वेंटी-२० संघाचे उप कर्णधारपद सोपवून भविष्याचेही संकेत दिले गेले.

गौतम गंभीरच्या मार्गदर्शनाखाली टीम इंडिया पहिल्या दौऱ्यासाठी काल श्रीलंकेत दाखल झाला. २७ जुलैपासून सुरू होणाऱ्या या दौऱ्यात भारतीय संघ ३ ट्वेंटी-२० व ३ वन डे सामन्यांची मालिका खेळणार आहे. या मालिकेसाठी रवाना होण्यापूर्वी गौतम गंभीर व निवड समिती प्रमुख अजित आगरकर यांनी पत्रकार परिषद घेतली आणि त्यात सर्व प्रश्नांची उत्तरं दिली. याचवेळी द्रविडने जे यश मिळवलं आहे, तशीच कामगिरी करण्याचा निर्धार गौतमने व्यक्त केला आणि हे सोपं नक्कीच नसेल हेही त्याने मान्य केले.

वर्ल्ड कप विजेता खेळाडू गौतम गंभीरसमोर २०२५ ची चॅम्पियन्स ट्रॉफी, २०२६ चा ट्वेंटी-२० वर्ल्ड कप, २०२७ चा वन डे वर्ल्ड कप आणि जागतिक कसोटी अजिंक्यपद स्पर्धा ही आव्हानं आहेत. त्याची सुरुवात श्रीलंका दौऱ्यावरून होणार आहे आणि गंभीर युगाची सुरुवात कशी होते, याकडे सर्वांचे लक्ष लागले आहे.

भारताचा वन डे संघ - रोहित शर्मा ( कर्णधार), शुभमन गिल ( उप कर्णधार), विराट कोहली, लोकेश राहुल, ऋषभ पंत, श्रेयस अय्यर, शिवम दुबे, कुलदीप यादव, मोहम्मद सिराज, वॉशिंग्टन सुंदर, अर्शदीप सिंग, रियान पराग, अक्षर पटेल, खलिल अहमद, हर्षित राणा.

भारताचा ट्वेंटी-२० संघ - सूर्यकुमार यादव ( कर्णधार), शुभमन गिल ( उप कर्णधार), यशस्वी जैस्वाल, रिंकू सिंग, रियान पराग, ऋषभ पंत, संजू सॅमसन, हार्दिक पांड्या, शिवम दुबे, अक्षर पटेल, वॉशिंग्टन सुंदर, रवी बिश्नोई, अर्शदीप सिंग, खलिल अहमद, मोहम्मद सिराज.