Jay Shah appointed ICC Chairman: भारतीय क्रिकेट नियामक मंडळाचे (BCCI) सचिव जय शाह यांना आता नवी जबाबदारी मिळाली आहे. जय शाह यांची आंतरराष्ट्रीय क्रिकेट परिषदेच्या (ICC) अध्यक्षपदी नियुक्ती झाली आहे.
जय शाह यांची आयसीसीच्या अध्यक्षपदी बिनविरोध निवड झाली आहे. त्यामुळे आयसीसीचे अध्यक्ष होणारे ते सर्वात तरुण सदस्य आहेत.
यापूर्वी आयसीसीचे अध्यक्षपद न्यूझीलंडच्या ग्रेग बार्क्ले यांच्याकडे होते. पण ते तिसऱ्या कार्यकाळासाठी इच्छुक नसल्याचे त्यांनी गेल्या आठवड्यात स्पष्ट केले होते. त्यांनी २०२० पासून हे पद सांभाळले होते. त्यांचा कार्यकाळ ३० नोव्हेंबर रोजी संपणार आहे.
त्यानंतर आता बार्क्ले पुन्हा या पदावर कायम राहण्यास तयार नसल्याने जय शाह यांचे नाव या पदासाठी आघाडीवर होते. २७ ऑगस्टपर्यंत यासाठी अर्ज दाखल करायचे होते. दरम्यान जय शाह यांनीच फक्त या पदासाठी अर्ज केल्याने त्यांची बिनविरोध निवड झाली. आता ते १ डिसेंबर २०२४ रोजी आयसीसीची सूत्र हाती घेतील.
