IPL 2025: द्रविड नाही, तर 'हा' महान अष्टपैलू घेणार गौतम गंभीरची जागा? KKR संघात होणार बदल

KKR Mentor: भारताचा माजी क्रिकेटपटू गौतम गंभीरला भारतीय पुरुष क्रिकेट संघाचा मुख्य प्रशिक्षक म्हणून निवडण्यात आले आहे. मात्र, आता यामुळे कोलकाता नाईट रायडर्स संघातील त्याची जागा रिकामी झाली आहे.

गंभीर आयपीएल २०२४ साठी कोलकाता नाईट रायडर्स संघाचा मेंटॉर होता. त्याच्याच मार्गदर्शनाखाली कोलकाताने आयपीएल २०२४ विजेतेपदही जिंकले होते.

मात्र, आता कोलकाता संघात मेंटॉरपद रिकामे आहे. दरम्यान, या पदासाठी राहुल द्रविडला विचारणा करण्याच आल्याचे रिपोर्ट्स समोर आले होते.

गंभीरपूर्वी २०२१ च्या अखेरीपासून ते टी२० वर्ल्ड कप २०२४ पर्यंत द्रविडने भारतीय संघाचे मुख्य प्रशिक्षकपद सांभाळले होते. त्याचा कार्यकाळ टी२० वर्ल्ड कपनंतर संपल्यानंतर तो सध्यातरी कोणत्याही पदावर नाही. अशात तो कोलकाता संघाचा मेंटॉर होऊ शकतो अशी जोरदार चर्चा होती.

मात्र, आता टेलिग्राफने दिलेल्या वृत्तानुसार कोलकाता संघ दक्षिण आफ्रिकेचा दिग्गज अष्टपैलू जॅक कॅलिसला मेंटॉर म्हणून घेण्याचा विचार करत आहेत. कॅलिस २०१६ ते २०१९ दरम्यान कोलकाता संघाचा मुख्य प्रशिक्षकही होता. तसेच तो २०११ ते २०१४ दरम्यान खेळाडू म्हणूनही आयपीएलमध्ये कोलकाताकडून खेळल आहे.

यादरम्यान, कोलकाताने २०१२ आणि २०१४ साली आयपीएलचे विजेतेपदही जिंकले होते. याशिवाय कॅलिसने यापूर्वी दक्षिण आफ्रिका आणि इंग्लंड या संघाचा फलंदाजी सल्लागार म्हणून काम केले आहे.

सहाय्यक प्रशिक्षकांची शोधाशोध

दरम्यान, गंभीरला मुख्य प्रशिक्षकपदी नियुक्त केले असले, तरी अद्याप त्याच्या सहाय्यक प्रशिक्षकांची नियुक्ती होणे बाकी आहे. यासाठी अनेक नावं चर्चेत आली आहे.

अनेक रिपोर्ट्सनुसार फलंदाजी प्रशिक्षकासाठी अभिषेक नायरचे नाव सर्वाधिक चर्चेत आहेत. तसेच गोलंदाजी प्रशिक्षकासाठी झहीर खान, लक्ष्मीपती बालाजी, मॉर्ने मॉर्केल अशी अनेक नावं चर्चेत आहेत.