पाकिस्तान क्रिकेटमध्ये गोंधळ; Babar Azam चा काल राजीनामा अन् आज खेळाडूची निवृत्ती

Usman Qadir Pakistan Cricket : पाकिस्तान क्रिकेट बोर्ड २०२५ मध्ये चॅम्पियन्स ट्रॉफी आयोजनाचे स्वप्न पाहत आहे आणि इथे त्यांच्या संघात गोंधळाचे वातावरण निर्माण झाले आहे. कर्णधारपदाची संगीतखूर्ची अजूनही कायम असलेली पाहायला मिळतेय. बाबर आझमने काल कर्णधारपदाचा पुन्हा राजीनामा दिला आणि आता फलंदाजीवर लक्ष केंद्रीत करणार असल्याचे जाहीर केले. त्यात आज लेग स्पिनर उस्मान कादिर याने निवृत्ती जाहीर केली आहे.

चार वर्ष ऑस्ट्रेलियात राहिल्यानंतर कादिर नुकताच पाकिस्तान आंतरराष्ट्रीय क्रिकेटमध्ये परतला. पण, ३१ वर्षीय कादिरने सोशल मीडियावरून निवृत्ती जाहीर करून पाकिस्तान क्रिकेटला धक्का दिला. ''आज, मी पाकिस्तान क्रिकेटमधून निवृत्ती जाहीर करत आहे,''असे कादिरने लिहिले. कादिर म्हणाला, "मी या अविस्मरणीय प्रवासावर विचार करत असताना, मला मनःपूर्वक कृतज्ञता व्यक्त करायचे आहे. माझ्या देशाचे प्रतिनिधित्व करणे हा एक मोठा सन्मान आहे आणि माझ्या मार्गात प्रत्येक पावलावर सोबत राहिलेल्या प्रशिक्षक आणि सहकाऱ्यांच्या पाठिंब्याबद्दल आभारी आहे."

कादिरने पाकिस्तानसाठी १ वन डे आणि २५ ट्वेंटी-२० सामने खेळले आहेत. झिम्बाब्वेविरुद्धच्या घरच्या मैदानावरील ट्वेंटी-२० मालिकेत त्याने पदार्पण केले. तीन सामन्यांत ६० धावांत आठ विकेट घेतल्याने त्याला मालिकावीर म्हणून घोषित करण्यात आले. तो पाकिस्तानचा प्रमुख लेगस्पिनर मानला जात होता, त्याने शादाब खानला T20I संघातून बाहेर ठेवले होते.

२०१८ मध्ये जेव्हा त्याने ऑस्ट्रेलियाचे प्रतिनिधित्व करण्याची इच्छा जाहीर केली तेव्हा तो पाकिस्तानसाठी आंतरराष्ट्रीय क्रिकेट खेळण्याची शक्यता नव्हती. त्याने २०१८ मध्ये वेस्टर्न ऑस्ट्रेलियासाठी पदार्पण केले आणि BBL मध्ये पर्थ स्कॉचर्स आणि सिडनी थंडरकडून खेळला. २०१९ च्या उत्तरार्धात तो जवळजवळ कुठेच नसताना मिसबाह-उल-हकने त्याला ऑस्ट्रेलियातील मालिकेसाठी पाकिस्तानच्या संघात स्थान दिले. काही आठवड्यांपूर्वी कादिरचे वडील आणि पाकिस्तानचा सर्वात प्रसिद्ध लेगस्पिनर अब्दुल कादिर यांचे हृदयविकाराच्या झटक्याने अचानक निधन झाले.

कादिरने आपल्या भविष्यातील योजना काय आहेत हे विधानात स्पष्ट केले नाही. "मी या नवीन अध्यायात पाऊल ठेवत असताना, मी माझ्या वडिलांचा वारसा पुढे चालू ठेवणार आहे, माझे क्रिकेटवरील प्रेम आणि त्यांनी शिकवलेले धडे या दोन्ही गोष्टी आत्मसात करेन. मी माझ्यासोबत पाकिस्तान क्रिकेटचा आत्मा आणि आम्ही एकत्र निर्माण केलेल्या प्रेमळ आठवणी घेऊन जात आहे."