MS Dhoni Birthday: धोनीने पत्नीबरोबर केला वाढदिवस साजरा, साक्षीने नमस्कार करत आशीर्वादही घेतले, पाहा Video

MS Dhoni Birthday Video: भारताचा माजी कर्णधार आणि यष्टीरक्षक एमएस धोनी रविवारी (७ जुलै) त्याचा ४३ वा वाढदिवस साजरा करत आहे. धोनीच्या वाढदिवसानिमित्त त्याच्यावर अनेकांनी शुभेच्छांचा वर्षाव केला आहे. त्याला त्याच्या पत्नीनेही खास अंदाजात शुभेच्छा दिल्यात.

तिने धोनी त्याच्या वाढदिवसाचा केक कापतानाचा व्हिडिओ शेअर केला आहे. यावेळी धोनी केक कापून झाल्यानंतर तिलाही तो भरवताना दिसला. इतकेच नाही, तर साक्षी धोनीच्या पाया पडून त्याचे आशीर्वादही घेताना दिसत आहे.

या व्हिडिओमध्ये धोनीच्या आजूबाजूला आणखीही काही माणसं असल्याचे आवाजांवरून तरी लक्षात येत आहे. तसेच धोनीही या व्हिडिओमध्ये केक एगलेस आहे ना? असंही विचारतो. या व्हिडिओला धोनीच्या चाहत्यांकडून मोठा प्रतिसाद मिळत असून अनेकांनी त्याला कमेंट्समध्ये वाढदिवसाच्या शुभेच्छाही दिल्या आहे.

खरंतर सध्या धोनी मुंबईत असल्याचे समजत आहे. कारण तो वाढदिवसाच्या दोन दिवसांपूर्वी बिझनेसमन मुकेश अंबानी यांचा मुलगा अनंत अंबानी आणि राधिका मर्चंट यांच्या लग्नापूर्वी झालेल्या संगीत सोहळ्यासाठी उपस्थित होता. त्यावेळी साक्षीही त्याच्याबरोबर होती.

धोनी वाढदिवसाच्या गिफ्टबद्दल मानलेले भारतीय संघाचे आभार

दरम्यान, २९ जून रोजी भारतीय संघाने टी२० वर्ल्ड कप विजयाला गवसणी घातली होती. त्याचबद्दल माजी कर्णधार धोनीने रोहित शर्माच्या नेतृत्वातील भारतीय संघाचे अभिनंदन करताना हा विजय त्याच्यासाठी वाढदिवसाचे अनमोल गिफ्ट असल्याचे म्हटले होते. तसेच त्यासाठी त्याने भारतीय संघाचे आभारही मानले होते.

धोनी काही महिन्यांपूर्वीच आयपीएल २०२४ स्पर्धा खेळला होता. दरम्यान, आता हा त्याचा अखेरचा हंगाम होता की तो पुढेही खेळत राहणार, हे अद्याप त्याने स्पष्ट केलेलं नाही.