MS Dhoni चा IPL मधील प्रवास संपला? BCCI चा निर्णय 'गेम' करणार, धोनीची CSKच्या मालकांशी चर्चा

MS Dhoni IPL 2025 Future : भारतीय संघाचा आणि चेन्नई सुपर किंग्सचा माजी कर्णधार महेंद्रसिंग धोनी याचा इंडियन प्रीमिअर लीगमधील प्रवास संपला आहे, असं समजायला हरकत नाही. कारण, तशी चर्चा आता जोर पकडू लागली आहे आणि BCCI चा नियम चेन्नई सुपर किंग्ससोबतचा ( CSK ) कॅप्टन कूलचा प्रवास संपवण्यासाठी कारणीभूत ठरणार आहे. चेन्नई सुपर किंग्स आणि धोनी यांच्या चाहत्यांसाठी हा खूप मोठा धक्का असणार आहे. भारताच्या माजी यष्टिरक्षकाने आंतरराष्ट्रीय क्रिकेटमधून निवृत्ती घेतली आहे आणि तो केवळ आयपीएल खेळतोय.

२०२३ मध्ये धोनीच्या गुडघेदुखीनं डोकं वर काढलं होत आणि तेव्हापासून त्याच्या आयपीएल खेळण्यावर चर्चा रंगल्या होत्या. मागच्या पर्वात CSK ने कर्णधारपदाची जबाबदारी ऋतुराज गायकवाड याच्याकडे सोपवण्यात आली. त्यानंतर धोनीच्या आयपीएल २०२५ खेळण्यावर प्रश्नचिन्हांनी जोर धरला आहे. त्याचं वय हेही यामागचं कारण आहे.

महान फलंदाज धोनीचे आयपीएल २०२५ मध्ये खेळणे, हे त्याच्या फिटनेसवर अवलंबून नाही, तर एका मिटिंगवर आहे... आयपीएल २०२५ पूर्वी मेगा ऑक्शन होणार आहे आणि येत्या ३० किंवा ३१ जुलै रोजी सर्व फ्रँचायझींची बीसीसीआयने बैठक बोलावली आहे. या बैठकीत होणाऱ्या निर्णयावर महेंद्रसिंग धोनीचे भवितव्य अवलंबून आहे. क्रिकबजने दिलेल्या वृत्तानुसार धोनी त्याच्या भवितव्याबाबत CSK फ्रँचायझी मालक एन श्रीनिवास यांच्याशी चर्चा केली आहे. त्यातही हाच निर्णय झाला की बीसीसीआय मेगा ऑक्शनसाठी किती खेळाडूंना रिटेन करते, यावर पुढचा निर्णय घेतला जाईल.

IPL 2025 Mega Auction पूर्वी होणाऱ्या बैठकीत किती खेळाडूंना रिटेन करण्याची परवानगी दिली जाते हा महत्त्वाचा मुद्दा आहे. जर BCCI ने फ्रँचायझींना ५ किंवा त्यापेक्षा जास्त खेळाडूंना रिटेन करण्याची परवानगी दिली, तर धोनी CSK चा यष्टिरक्षक-फलंदाज म्हणून खेळू शकतो. पण, जर ४ किंवा त्यापेक्षा कमी खेळाडूंना रिटेन करण्याचा निर्णय झाल्यास CSK ऋतुराज, रवींद्र जडेजा, मथिशा पथिराणा आणि शिवम दुबे यांना कायम राखेल. या परिस्थितीत धोनी खेळू शकणार नाही.

पण, असे असले तरी तो CSK ची साथ सोडणार नाही हे निश्चित आहे. आयपीएल २०२५ च्या पर्वात तो CSK च्या डग आऊटमध्ये मेंटॉर म्हणून दिसू शकतो. २००८ पासून तो चेन्नई फ्रँचायझीचा सदस्य आहे.