India vs New Zealand Women ODI: न्यूझीलंड क्रिकेटमध्ये सध्या आनंदाचे वातावरण आहे. न्यूझीलंडच्या महिला संघाने नुकतेच रविवारी (२० ऑक्टोबर) महिला टी२० वर्ल्ड कप २०२४ स्पर्धा जिंकली. असे असतानाच आता लगेचच न्यूझीलंडचा महिला संघ भारत दौऱ्यावर येणार आहे. या दौऱ्यात न्यूझीलंड महिला संघाला भारतीय महिला संघाविरुद्ध तीन सामन्यांची वनडे मालिका खेळायची आहे.
या मालिकेसाठी काही दिवसांपूर्वीच भारतीय महिला संघाची घोषणा झाली आहे. आता मंगळवारी (२२ ऑक्टोबर) न्यूझीलंड महिला संघाचीही घोषणा करण्यात आली आहे. महत्त्वाचे म्हणजे टी२० वर्ल्ड कप जिंकलेल्या संघातील जवळपास सर्व खेळाडू न्यूझीलंडच्या वनडे संघातही आहे.
केवळ विश्वविजेत्या संघातील वेगवान गोलंदाज रोजमेरी मेअर आणि फिरकीपटू लेह कास्पेरेक यांना वनडे संघातून वगळण्यात आले आहे. रोजमेरी मेअरला विश्रांती देण्यात आली आहे.
