CPL 2024: प्रीती झिंटाच्या संघाची विजेतेपदाची प्रतीक्षा संपली, फाफ डू प्लेसिसच्या नेतृत्वात ठरले चॅम्पियन

St Lucia Kings won CPL 2024: रविवारी (६ ऑक्टोबर) कॅरेबियन प्रीमियर लीग २०२४ स्पर्धेचा अंतिम सामना प्रोव्हिडन्स येथे गयाना ऍमेझॉन वॉरियर्स विरुद्ध सेंट लुसिया किंग्स संघात पार पडला. या सामन्यात सेंट लुसियाने ६ विकेट्सने विजय मिळवत पहिल्यांदाच सीपीएलचे विजेतेपद जिंकले आहे.

या संघाची सहमालकी प्रीती झिंटा, नेस वाडिया यांच्याकडे असून आयपीएलमधील पंजाब किंग्स संघाची ही सिस्टर फ्रँचायझी आहे.

दरम्यान, सेंट लुसिया किंग्सने हे विजेतेपद मुख्य प्रशिक्षक डॅरेन सॅमीच्या मार्गदर्शनाखाली आणि कर्णधार फाफ डू प्लेसिसच्या नेतृत्वाखी पहिल्यांदाच सीपीएलचे विजेतेपद मिळवले.

अंतिम सामन्यात सेंट लुसियाने नाणेफेक जिंकून प्रथम क्षेत्ररक्षण करण्याचा निर्णय घेतला होता. त्यामुळे ऍमेझॉन वॉरियर्स संघ प्रथम फलंदाजीसाठी उतरला. ऍमेझॉन वॉरियर्स प्रथम फलंदाजी करताना २० षटकात ८ बाद १३८ धावाच केल्या.

त्यांच्याकडून ड्वेन प्रीटोरियसने सर्वाधिक २५ धावा केल्या. तसेच शाय होपने २२ धावांची खेळी केली. बाकी कोणालाही २० धावांचा टप्पा ओलांडता आला नाही.

सेंट लुसियाकडून नूर अहमदने सर्वाधिक ३ विकेट्स घेतल्या. तसेच खॅरी पिएर, मॅथ्यु फोर्डे, अल्झारी जोसेफ, रोस्टन चेस आणि डेविड विसे यांनी प्रत्येकी १ विकेट घेतली.

त्यानंतर फलंदाजीला उतरलेल्या सेंट लुसियासमोर १३९ धावांचे आव्हान होते. हे आव्हान सेंट लुसियाने १८.१ षटकात ४ विकेट्स गमावत पूर्ण केले. त्यांच्याकडून रोस्टन चेस आणि ऍरॉन जोन्स यांनी आक्रमक खेळत ८८ धावांची नाबाद भागीदारी करत संघाला विजय मिळवून देण्यात मोलाचा वाटा उचलला.

रोस्टन चेस २२ चेंडूत ३९ धावांवर नाबाद राहिला. जोन्सने ३१ चेंडूत ४८ धावांची नाबाद खेळी केली. याबरोबरच कर्णधार फाफ डू प्लेसिसने २१ धावांची खेळी केली.

ऍमेझॉन वॉरियर्सकडून रोमारियो शेफर्ड, केविन सिन्केअर, मोईन अली आणि ड्वेन प्रीटोरियस यांनी प्रत्येकी १ विकेट घेतली.