Rahul Dravid : ती वेळ चांगली नव्हती.... पंतप्रधान मोंदीना भेटीवेळी द्रविड वनडे वर्ल्डकप फायनलबद्दल काय म्हणाला?

PM Narendra Modi Meet Team India Rahul Dravid : भारताच्या टी 20 वर्ल्डकप विजेती टीम 4 जुलैला संध्याकाळी मुंबईत दाखल झाली. त्यापूर्वी भारतीय संघाने दिल्लीत लँड होताच पंतप्रधान नरेंद्र मोदींची भेट घेतली होती. त्याचा व्हिडिओ आता शेअर करण्यात आला आहे. यावेळी मोदींनी संघातील प्रत्येक खेळाडूसोबत संवाद साधला.

दरम्यान, पंतप्रधान नरेंद्र मोदी आणि राहुल द्रविड यांचे देखील संभाषण झालं. यावेळी राहुल द्रविडने पंतप्रधान मोदींचे या भेटीसाठी आभार मानले. तसेच 2023 च्या वनडे वर्ल्डकप फायनलवेळी मोदी आणि अमित शहा यांनी टीम इंडियाची ड्रेसिंग रूममध्ये जाऊन भेट घेतली होती. याबद्दल देखील राहुल द्रविडने वक्तव्य केलं.

राहुल द्रविड पंतप्रधानांशी बोलताना म्हणाला की, 'तुम्हाला भेटण्याची संधी आम्हाला दिल्याबद्दल तुमचे आभार. अहमदाबादच्या सामन्यावेळी देखील तुम्ही आम्हाला भेटण्यासाठी आला होता. मात्र ती वेळ योग्य नव्हती या मताशी मी सहमत आहे. त्यामुळं आज आपण या आनंदाच्या क्षणी भेटतोय याचा मला खूप आनंद आहे.'

'मी यावेळी इतकं सागू इच्छितो की रोहित शर्मा आणि संघातील सर्व खेळाडूंनी दाखवलेला झुंजारपणा अन् हार न मानण्याची वृत्ती खूप महत्वाची होती. या यशाचं सर्व श्रेय हे या खेळाडूंनाच जाते. त्यांनी यासाठी खूप कष्ट केले आहेत. या खेळाडूंनी युवा पिढीला प्रेरित केलं आहे. ही खूप आनंदाची बाब आहे.'

पंतप्रधान नरेंद्र मोदी यांनी खेळाडूंच्या भेटीवेळी प्रत्येक खेळाडूशी संवाद साधला. हार्दिक पांड्याला शेवटचं षटक टाकताना कशी भावना होती. सूर्यकुमार यादवला देखील क्लासेनच्या कॅचबद्दल मोदींनी प्रश्न विचारला. यावेळी मोदींनी अनेक खेळाडूंसोबत हास्यविनोद देखील केला.