Ranji Trophy 2024: महाराष्ट्रावर मेघालयाचा अनिरुद्ध पडला भारी; १४० धावांच्या नाबाद खेळीने गोलंदाज हैराण

Maharashtra vs Meghalaya Ranji Trophy 2024: महाराष्ट्र-मेघालया रणजी ट्रॉफी स्पर्धेतील तिसऱ्या फेरीच्या सामन्याला आजपासून सुरूवात झाली. मागच्या सामन्यात महाराष्ट्राला मुंबईविरूद्ध पराभव पत्कारावा लागला होता. तर जम्मू काश्मिरविरूद्धचा पहिला सामना अनिर्णीत राहिला. आजपासून सुरू झालेल्या तिसऱ्या सामन्यात महाराष्ट्राने नाणेफेक जिंकत प्रथम गोलंदाजीचा निर्णय घेतला. तर, प्रथम फलंदाजी करणाऱ्या मेघालयाने महाराष्ट्राविरूद्ध जोरदार फटकेबाजी करत पहिल्या दिवसाअंती ८ विकेट्स गमावून २७४ धावा केल्या. ज्यामध्ये बालचंदर अनिरुद्ध शतकी खेळी करून १४० धावांवर नाबाद आहे.

मेघालयाचा सलामीवर बामनभा शांगपलियांग आक्रमक फलंदाजी करत होता, तर दुसऱ्या बाजूने अर्पित भाटेवाला संथ खेळी खेळत होता. त्याने ७ धावा करण्यासाठी ३१ चेंडू घेतले व १५ व्या षटकात बाद झाला. २० व्या षटकात साथीदार बामनभाही झेलबाद झाला.

पुढे अजय राधाकृष्ण दुहान व बालचंदर अनिरुद्धने सान्यात गती पकडली. दोघांची शतकी भागीदारी पुर्ण होताच अजयने साथ सोडली, तो ३४ धावांवर त्रिफळाचित झाला. महाराष्ट्राच्या रजनीश गुरबानीला त्यांची भागीदारी मोडण्यात यश आले.

त्यानंतर बालचंदरने किशनला साथीला घेत फटकेबाजी सुरूच ठेवली. किशनने संघाच्या धावसंख्येत २२ धावांची भर टाकली व तो झेलबाद होऊन परतला. त्यानंतर मेघालयाचा डाव एका बाजूने घसरायला सुरूवात झाली. पण दुसऱ्या बाजूने बालचंदर धावा करत राहीला आणि पहिल्या दिवशी मेघालयाला २७४ धावांचा टप्पा गाठून देण्यात महत्वाचे योगदान दिले.

सामन्यामध्ये महाराष्ट्राच्या रजनीश गुरबानीला ३ विकेट्स घेण्यात यश आले. मुकेश चौधरीने २ विकेट्स घेतल्या. तर, प्रदीप दाढे, सिद्धेश वीर, व हितेश वळंजू यांना प्रत्येकी १ विकेट मिळाला.