Ruturaj Gaikwad च्या नेतृत्वाखालील संघाने श्रेयस अय्यरच्या टीमला नमवले; Duleep Trophy त महत्त्वाचे ६ गुण कमावले

India C defeated India D in Duleep Trophy 2024: दुलीप ट्रॉफी २०२४ मध्ये ऋतुराज गायकवाडच्या नेतृत्वाखाली खेळणाऱ्या भारत क संघाने ४ विकेट्स राखून विजय मिळवला. त्यांनी श्रेयस अय्यरच्या भारत ड संघाचा पराभव करून महत्त्वाचे ६ गुण खात्यात जमा केले. ७ विकेट्स घेणारा मानव सुतार या सामन्यात चमकला.

भारत ड ने प्रथम फलंदाजी करताना पहिल्या डावात १६४ धावा केल्या. अक्षर पटेल ( ८६) हा त्यांच्याकडून त्या डावात सर्वाधिक धावा करणारा फलंदाज ठरला. भारत क च्या विजयकुमार वैशाकने ३, अंशूल कंबोज व हिमांशू चौहान यांनी प्रत्येकी दोन विकेट्स घेतल्या. प्रत्युत्तरात भारत क संघालाही १६८ धावा करता आल्या. बाबा इंद्रजितने सर्वाधिक ७२ धावा केल्या आणि त्याला अभिषेक पोरेलची ( ३४) चांगली साथ मिळाली. हर्षित राणाने चार विकेट्स घेतल्या.

भारत ड संघाने दुसऱ्या डावात २३६ धावा केल्या. कर्णधार श्रेयस अय्यर ( ५४), देवदत्त पड्डिकल ( ५६) व रिकी भूई ( ४४) यांनी दमदार फलंदाजी केली. अक्षर पटेलने २८ धावांचे योगदान दिले. भारत क संघाच्या मानव सुतारने ४९ धावांत ७ विकेट्स घेतल्या. प्रत्युत्तरात ऋतुराजने ४८ चेंडूंतत ४६ धावांची खेळी केली. आर्यन जुयाल ( ४७) व रजत पाटीदार ( ४४) यांच्यासह अभिषेक पोरेल ( ३५) व साई सुदर्शन ( २२) यांनी चांगला खेळ केला. भारत क ने ६ बाद २३३ धावा करून विजय पक्का केला.

दरम्यान, भारत ब आणि भारत अ संघांमधील लढतीत ब संघाचे २३० धावांची आघाडी घेतली आहे. भारत ब संघाच्या पहिल्या डावातील ३२१ धावांच्या प्रत्यत्तरात भारत अ संघाला २३१ धावा करता आल्या. ब संघाकडून मुशीर खान ( १८१) आणि नवदीप सैनी ( ५६) यांनी चांगली फलंदजी केली होती. दुसऱ्या डावात ब संघाने २५ षटकांत ५ बाद १४० धावा केल्या आहेत. सरफराज खान ( ४६) आणि ऋषभ पंत ( ६१ ) यांनी दमदार फटकेबाजी केली.