South Africa squad vs India T20I : भारताविरुद्धच्या ट्वेंटी-२० मालिकेसाठी दक्षिण आफ्रिकेने १५ सदस्यीय संघ जाहीर केला. भारत-दक्षिण आफ्रिका यांच्यात ४ सामन्यांची ट्वेंटी-२० मालिका होणार आहे. सूर्यकुमार यादवच्या नेतृत्वाखाली भारतीय संघ या मालिकेत खेळणार आहे आणि व्ही व्ही एस लक्ष्मण हे प्रभारी प्रशिक्षक म्हणून या दौऱ्यावर संघासोबत असणार आहे. दक्षिण आफ्रिकेने या मालिकेसाठी संघ जाहीर केला आणि त्यात डेव्हिड मिलर व हेनरिच क्लासेन यांचे संघात पुनरागमन झाले आहे. ट्वेंटी-२० वर्ल्ड कप फायनलमधील पराभवानंतर दोघंही एकही आंतरराष्ट्रीय सामना खेळलेले नाहीत.
२४ वर्षीय मिहलाली एमपोंगवाना याला पदार्पणाची संधी मिळाली आहे आणि त्याने क्रिकेट दक्षिण आफ्रिका ट्वेटी-२० चॅलेंज स्पर्धेत सर्वाधिक १२ विकेट्स घेतल्या होत्या. प्रमुख गोलंदाज कागिसो रबाडा याला या मालिकेसाठी विश्रांती दिली गेली आहे. त्याच्यासह लुंगी एनगिडीही या संघात नाही. या दोघांना नोव्हेंबरमध्ये होणाऱ्या श्रीलंकेविरुद्धच्या दोन कसोटीसाठी पुरेशी विश्रांती मिळावी म्हणून हा निर्णय घेतला गेला आहे. भारताविरुद्धची ट्वेंटी-२० मालिका ८ नोव्हेंबरपासून सुरू होणार आहे.