Virat Kohli-Anushka Sharma: माझी बॅट माझी बॅटिंग... अनुष्काच्या अनोख्या Rules वर विराटची फटकेबाजी अन् मग...

Virat Kohli - Anushka Sharma Video: भारताचा क्रिकेटपटू विराट कोहली आणि त्याची पत्नी व अभिनेत्री अनुष्का शर्मा ही लोकप्रिय जोड्यांपैकी एक आहे. त्यामुळे त्यांच्याबद्दल बऱ्याचदा चर्चा होत असतात. त्यांनी यापूर्वी एकत्र काही जाहिरातींमध्ये कामही केले आहे.

आता पुन्हा एकदा त्यांनी जाहिरातीसाठी स्क्रिन शेअर केली असून त्याचा व्हिडिओही सध्या गाजतोय. या व्हिडिओमध्ये विराट आणि अनुष्का गल्ली क्रिकेट खेळताना दिसत आहेत. हा व्हिडिओ त्यांनी सोशल मीडियावर शेअर केला आहे.

क्रीडा साहित्य बनवणाऱ्या एका मोठ्या ब्रँडच्या या जाहिरातीमध्ये विराट आणि अनुष्का क्रिकेट खेळण्याआधी चर्चा करताना दिसत आहेत. यावेळी अनुष्का सांगते की या खेळात नियम तिचे असणार आहे. ती अनेक मजेशीर नियम विराटला वाचून दाखवताना दिसत आहे. त्यावेळी विराटच्या हातात बॅट असते.

अनुष्का नियम वाचून दाखवते की 'जर तीनवेळा बॉल मिस झाला, तर आऊट, जर तू चिडला तर आऊट, अंगाला बॉल लागला, तर आऊट'. ती नियम वाचत असतानाच विराट तिला अडवून म्हणतो चल बस आता खेळू, त्याचवेळी अनुष्का त्याला आणखी एक नियम सांगते की ज्याची बॅट, त्याची बॅटिंग. त्यामुळे ती त्याच्याकडून बॅट घेते आणि फलंदाजी करायला जाते.

ती फलंदाजी करत असतानाच विराट तिला पहिल्याच बॉलवर क्लिनबोल्ड करतो. पण ती त्याला आणखी एक नियम सांगते की पहिला बॉल हा ट्रायल होता. पण नंतर पुढच्या बॉलवरही विराट तिला आऊट करतो.

त्यानंतर अनुष्काच्या बॉलवर विराट जोरात शॉट खेळतो. त्यामुळे बॉल दूरवर जातो. पण त्याचवेळी अनुष्का त्याला पुन्हा म्हणते की नवा नियम जो बॉल मारेल, तोच परत घेऊन येईल. त्यानंतर वैतागून विराट बॉल आणायलाही जातो.

पुढच्या बॉलवर विराट लांब थांबलेला असतानाच अनुष्का त्याला आऊट करते. विराट आणि अनुष्का यांचा हा गमतीशीर व्हिडिओ चाहत्यांच्या पसंतीस उतरत असून व्हायरल होत आहे. त्यावर अनेकांनी कमेंट्सही केल्या आहेत.

विराट आणि अनुष्का यांनी काही वर्षे एकमेकांना डेट केल्यानंतर डिसेंबरल २०१७ मध्ये इटलीत लग्न केले. त्यांना जानेवारी २०२१ मध्ये कन्यारत्न प्राप्त झाले, जिचं नाव त्यांनी वामिका ठेवलं आहे. तसेच त्यांना फेब्रुवारी २०२४ मध्ये मुलगा झाला, ज्याचं नाव त्यांनी अकाय ठेवले आहे.