Virender Sehwag Son: भले शाब्बास! सेहवागच्या लेकाने गाजवला पदार्पणाचा सामना, दिल्लीला मिळवून दिला शानदार विजय

Vinoo Mankad Trophy 2024: भारतीय क्रिकेटपटू सचिन तेंडुलकर, राहुल द्रविड, विरेंद्र सेहवाग यांनी एक काळ गाजवला आहे. आता त्यांची पुढची पिढी क्रिकेट खेळताना दिसत आहे. सचिनचा मुलगा अर्जुन आणि द्रविडचा मुलगा समित यांचे वरिष्ठ स्तरावर क्रिकेटमध्ये पदार्पण झाले आहे.

आता सेहवागचा मुलगाही आर्यवीरही क्रिकेट खेळताना दिसत आहे. त्याने १९ वर्षांखालील दिल्लीकडून नुकतेच पदार्पण केले आहे. तो भारताची १९ वर्षांखालील देशांतर्गत स्पर्धा विनू मंकड ट्रॉफी स्पर्धेत दिल्लीकडून खेळत आहे.

त्याने पहिल्याच सामन्यात दिल्लीला मणीपुर विरुद्ध ६ विकेट्सने विजय मिळवून देण्यात मोलाचा वाटा उचलला. या सामन्यात मणीपुरने दिल्लीसमोर विजयासाठी ५० षटकात १६९ धावांचे आव्हान ठेवले होते.

या आव्हानाचा पाठलाग करण्यासाठी आर्यवीर आणि सार्थक राय हे सलामीला फलंदाजीसाठी उतरले. त्यांनी सुरुवात चांगली केली. सार्थकने आक्रमक खेळ केला. पण तो १७ चेंडूत २५ धावा करून बाद झाला. त्यापाठोपाठ आदित्य कुमारही ८ धावांवर बाद झाला. पण आर्यवीरला नंतर कर्णधार प्रणव पंतने चांगली साथ दिली.

या दोघांनी अर्धशतकी भागीदारीही केली. पण आर्यवीरला अर्धशतकासाठी केवळ १ धावेची गरज असताना दानिशने बाद केले. त्यामुळे आर्यवीरला ६४ चेंडूत ६ चौकार आणि १ षटकारासह ४९ धावा करून माघारी परतावे लागले.

त्यानंतर आदित्य भंडारीही १ धावेवर बाद झाला. पण प्रणवने ४५ चेंडूत नाबाद ७५ धावा करत दिल्लीला २६ षटकातच विजय मिळवून दिला. दिल्लीने २६ षटकात ४ बाद १७१ धावा केल्या. मणीपूरकडून सर्वाधिक २ विकेट्स घेतल्या.

तत्पुर्वी मणीपूरने प्रथम फलंदाजी करताना ४९.१ षटकात सर्वबाद १६८ धावा केल्या होत्या. मणीपूरकडून अलीकरिमने सर्वाधिक ५६ धावांची खेळी केली. तसेच मोहम्मद अकिल अहमदने ४५ धावांची खेळी केली. याशिवाय कोणाला खास काही करता आले नाही.

दिल्लीकडून लक्ष्मणने सर्वाधिक ३ विकेट्स घेतल़्या, तसेच दिवांश रावत आणि अमन चौधरी यांनी प्रत्येकी २ विकेट्स घेतल्या. प्रणव पंत आणि सक्षम गाहलोत यांनी प्रत्येकी १ विकेट घेतली.