WI vs SA T20I : 6,6,6,6,6,6,6...! निकोलस पूरनसह विंडीजचे तिघं दक्षिण आफ्रिकेवर भारी पडले अन्...

West Indies vs South Africa 1st T20I: वेस्ट इंडिजने पहिल्या ट्वेंटी-२० सामन्यांत दक्षिण आफ्रिकेवर दणदणीत विजय नोंदवला. अॅलिक अथानाझे, निकोलस पूरन आणि शे होप या तिघांनी आफ्रिकेच्या गोलंदाजांना बेक्कार चोपले. या तिघांच्या फटकेबाजीमुळे विंडीजने १७५ धावांचे लक्ष्य १७.५ षटकांत ३ विकेट्सच्या मोबदल्यास सहज पार केले. तीन सामन्यांच्या मालिकेत विंडीजकडे १-० अशी आघाडी आली आहे.

ट्वेंटी-२० वर्ल्ड कप फायनलमधील पराभवातून सावरून आफ्रिकेचा संघ मैदानावर उतरला. रायन रिकेल्टन व रिझा हेंड्रीक्स हे सलामीवीर एकेरी धावेत माघारी परतले. कर्णधार एडन मार्करामने १४ धावा केल्या, परंतु मॅथ्यू फोर्डने त्याला बाद केले. आफ्रिकेची पडझड सुरू असताना त्रिस्तान स्तब्स व पॅट्रीक क्रुगर यांनी दमदार खेळ केली. स्तब्सने ४२ चेंडूंत ८ चौकार व ३ षटकारांसह ७६ धावा चोपल्या, तर पॅट्रीकने ३२ चेंडूंत ४ चौकार व २ षटकारांसह ४४ धावांची खेळी केली.

७१ धावा

क्रुगर आणि स्तब्स यांची ७१ धावांची भागीदारी ही दक्षिण आफ्रिकेसाठी ट्वेंटी-२०तील सहाव्या विकेटसाठी सर्वोत्तम ठरली. यापूर्वी हा विक्रम मार्क बाऊचर व एल्बी मॉर्केल ( ६९ धावा) यांच्या नावावर होता.

६० धावा

बीजॉर्न फॉर्च्यून आणि स्तब्स यांनी सातव्या विकेटसाठी ६० धावांची भागीदारी केली. सातव्या विकेटसाठी आफ्रिकेकडून ही ट्वेंटी-२०तील सर्वोत्तम भागीदारी ठरली. यापूर्वी शॉन पोलॉक व एल्बी मॉर्केल यांनी ५७ धावा केल्या होत्या.

विंडीजच्या मॅथ्यूने ३, तर शामर जोसेफने दोन विकेट्स घेतल्या. लक्ष्याचा पाठलाग करताना विंडीजच्या आघाडीच्या फलंदाजांनीच विजयाचा भक्कम पाया रचला. सलामीवीर अथानाझे व होप यांनी ८ षटकांत ८४ धावांची भागीदारी केली. अथानाझे ३० चेंडूंत २ चौकार व ३ षटकारांसह ४० धावांवर बाद झाला. त्यानंतर होप अन् पूरन यांनी भार पेलला.. होपने ३६ चेंडूंत २ चौकार व ३ षटकारांसह ५१ धावांची खेळी केली. पूरनने सूत्र हाती घेताना सामना संपवला. त्याने २६ चेंडूंत २ चौकार व ७ षटकारांसह ६५ धावांची नाबाद खेळी केली. विंडीजने १७.५ षटकांत ३ बाद १७६ धावा करून विजय मिळवला.