West Indies won against South Africa in 2nd T20I: दक्षिण आफ्रिका सध्या वेस्ट इंडिज दौऱ्यावर असून टी२० मालिका खेळत आहे. या तीन सामन्यांच्या टी२० मालिकेतील दुसरा सामना वेस्ट इंडिजने ३० धावांनी जिंकला. यासह वेस्ट इंडिजने मालिकेत २-० अशी आघाडी घेत मालिका खिशात टाकली. वेस्ट इंडिजच्या या विजयात रोमारियो शेफर्डने मोलाचा वाटा उचलला.
त्रिनिदादला झालेल्या या सामन्यात वेस्ट इंडिजने दक्षिण आफ्रिकेसमोर १८० धावांचे लक्ष्य ठेवले होते. या लक्ष्याचा पाठलाग करताना दक्षिण आफ्रिकेला १९.४ षटकात सर्वबाद १४९ धावाच करता आल्या. वेस्ट इंडिजकडून रोमरियो शेफर्डने ४ षटकात १५ धावा देत ३ विकेट्स घेतल्या. त्याने रिझा हेंड्रिक्स, ट्रिस्टन स्टब्स आणि पॅट्रिक क्रुगर या महत्त्वाच्या विकेट्स घेतल्या.
दक्षिण आफ्रिकेकडून रायन रिकेल्टन आणि रिझा हेंड्रिक्स यांनी सलामीला ६१ धावांची आक्रमक भागीदारी केली होती. मात्र दमदार सुरुवातीनंतर दक्षिण आफ्रिकेला लय कायम ठेवता आली नाही. रायनला शामर जोसेफने २० धावांवर बाद केले, तर पुढच्या षटकात हेंड्रिक्सला शेफर्डने बाद करत दक्षिण आफ्रिकेला मोठा धक्का दिला.
हेंड्रिक्सने १८ चेंडूत ४४ धावांची खेळी केली होती. त्यानंतर कर्णधार एडेन मार्करम (१९), ट्रिस्टन स्टब्स (२८) आणि रस्सी वॅन डर द्युसेन (१७) यांनी दोन आकडी धावसंख्या पार केली, पण त्यांना मोठी खेळी करता आली नाही. अखेरच्या पाच षटकात दक्षिण आफ्रिकेने अवघ्या ११ धावांत उर्वरित ५ विकेट्स गमावल्या. त्यामुळे त्यांना हा सामनाही गमवावा लागला.
वेस्ट इंडिजकडून गोलंदाजी करताना शेफर्ड व्यतिरिक्त शामर जेसेफनेही ३ विकेट्स घेतल्या, तसेच अकील हुसेनने २ विकेट्स घेतल्या. त्याचबरोबर मॅथ्यू फोर्डे आणि गुडाकेश मोती यांनी प्रत्येकी १ विकेट घेतली.
तत्पुर्वी, दक्षिण आफ्रिकेने नाणेफेक जिंकून वेस्ट इंडिजला प्रथम फलंदाजी करण्यासाठी पाचारण केले होते. त्यामुळे वेस्ट इंडिज प्रथम फलंदाजीला उतरल्यानंतर २० षटकात ६ बाद १७९ धावा केल्या.
वेस्ट इंडिजकडून सलामीवीर शाय होपने सर्वाधिक ४१ धावांची खेळी केली. तसेच कर्णधार रोवमन पॉवेलने ३५ धावा केल्या, तर शेर्फेन रुदरफोर्डने २९ धावा केल्या. त्याचबरोबर एलिक एथानाझने २८ धावा केल्या.
दक्षिण आफ्रिकेकडून गोलंदाजी करताना लिझाद विलियम्सने सर्वाधिक ३ विकेट्स घेतल्या. तसेच पॅट्रिक क्रुगरने २ विकेट्स घेतल्या आणि ओटनील बार्टमनने १ विकेट घेतली.
आता दक्षिण आफ्रिका आणि वेस्ट इंडिज यांच्यातील तिसरा टी२० सामना २७ ऑगस्ट रोजी होणार आहे. या सामन्यात विजय मिळवून वेस्ट इंडिजकडे दक्षिण आफ्रिकेला व्हाईटवॉश देण्याची संधी असणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
