Women's Asia Cup: शिक्कामोर्तब झालं! भारतासह हे तीन संघ खेळणार सेमीफायनल, पाहा संपूर्ण शेड्युल

Women's Asia Cup 2024: महिला आशिया कप २०२४ स्पर्धेत बुधवारी (२४ जुलै) ब गटातील साखळी फेरीचे अखेरचे सामने झाले. त्यामुळे आता उपांत्य फेरीत प्रवेश करणाऱ्या अंतिम ४ संघांवर शिक्कामोर्तब झाले आहे.

उपांत्य फेरीत भारत, पाकिस्तान, श्रीलंका आणि बांगलादेश या महिला संघांनी स्थान पक्के केले आहे.

अ गटातून भारत आणि पाकिस्तान संघांनी उपांत्य फेरीत स्थान मिळवलं आहे. या गटात भारत तीन विजयांसह अव्वल क्रमांकावर राहिला, तर पाकिस्तान दोन विजय आणि एका पराभवासह दुसऱ्या क्रमांकावर राहिला.

आता ब गटातील अखेरच्या साखळी सामन्यांमध्ये बांगलादेशने मलेशियालाला ११४ धावांनी पराभूत केलं, तर श्रीलंकेने १० विकेट्सने थायलंडला पराभूत केलं.

त्यामुळे ब गटात श्रीलंकेने तीन विजयांसह अव्वल क्रमांक मिळवला आहे, तर बांगलादेशने दोन विजय आणि एका पराभवासह दुसरा क्रमांक मिळवला. त्यामुळे श्रीलंका आणि बांगलादेश हे दोन संघ उपांत्य फेरीसाठी पात्र ठरले.

त्यामुळे आता उपांत्य फेरीत कोणाचे सामने कोणाविरुद्ध आणि कधी होणार हे समोर आले आहे.

अ गटात अव्वल क्रमांकावर राहिलेल्या भारतीय महिला संघाचा सामना ब गटातील दुसऱ्या क्रमांकावर राहिलेल्या बांगलादेश महिला संघाविरुद्ध होणार आहे. हा सामना डंबुला येथे शुक्रवारी भारतीय प्रमाणवेळेनुसार दुपारी २ वाजता सुरू होईल.

तसेच ब गटात अव्वल क्रमांकावर राहिलेल्या श्रीलंकेचा सामना अ गटात दुसऱ्या क्रमांकावर राहिलेल्या पाकिस्तानविरुद्ध शुक्रवारीच डंबुला येथे संध्याकाळी ७ वाजता सुरू होणार आहे. या उपांत्य फेरीच्या सामन्यांत विजय मिळवणारे संघ रविवारी अंतिम सामन्यात आमने-सामने येतील.

असे आहे महिला आशिया कप बाद फेरीचे वेळापत्रक

उपांत्य फेरी

• २६ जुलै - भारत विरुद्ध बांगलादेश, डंबुला (वेळ - दु. २.०० वाजता)

• २६ जुलै - श्रीलंका विरुद्ध पाकिस्तान, डंबुला (वेळ - संध्या. ७.०० वाजता)

अंतिम सामना -

• २८ जुलै - डंबुला (वेळ - संध्या. ७ वाजता)