Women's Asia Cup 2024: भारताची विजयी सुरुवात! पहिल्याच सामन्यात पाकिस्तानला केलं चारीमुंड्या चीत

Women's Asia Cup 2024, India vs Pakistan: महिला आशिया कप 2024 स्पर्धेतील दुसरा सामना शुक्रवारी (19 जुलै) भारत विरुद्ध पाकिस्तान संघात होत आहे. डंबुला येथे होत असलेल्या या सामन्यात भारतीय संघाने 7 विकेट्सने दणदणीत विजय मिळवला.

या स्पर्धेतील हा दोन्ही संघांचा पहिला सामना होता. त्यामुळे भारताने या स्पर्धेतील मोहिमेची सुरुवात विजयाने केली, तर पाकिस्तानची सुरुवात पराभवाने झाली आहे. लक्षात घेण्यासारखी गोष्ट अशी की भारतीय महिला संघाचा हा आंतरराष्ट्रीय टी20 क्रिकेटमधील 100 वा विजय ठरला.

या सामन्यात पाकिस्तानने भारतासमोर 109 धावांचे आव्हान ठेवले होते. या आव्हानाचा पाठलाग भारतीय संघाने 14.1 षटकात 3 विकेट्स गमावत सहज पूर्ण केला.

या सामन्यात भारताकडून सलामीला आलेल्या शफली वर्मा आणि स्मृती मानधना यांनी चांगली सुरुवात केली. काही चांगले आक्रमक शॉट्सही या दोघींनी खेळत सलामीला 85 धावांची भागीदारी रचली. मात्र, दोघींचेही अर्धशतक थोडक्यात हुकले. 10 व्या षटकात मानधनाला सईदा अरुब शाहने बाद केले.

स्मृतीने 31 चेंडूत 45 धावा केल्या. तसेच 12 व्या षटकात शफलीला सईदाने 40 धावांवर त्रिफळाचीत केले. पण तोपर्यंत भारतीय संघ विजयाच्या जवळ पोहचला होता.

मात्र, यादरम्यान 13 व्या षटकात दयालन हेमलता 14 धावांवर बाद झाली. पण अखेरीस भारताच्या विजयाची औपचारिकता कर्णधार हरमनप्रीत कौर आणि जेमिमाह रोड्रिग्सने पूर्ण केली. हरमनप्रीत 5 धावांवर आणि जेमिमाह 3 धावांवर नाबाद राहिल्या.

पाकिस्तानकडून सईदाने 2 विकेट्स, तर नशरा संधूने 1 विकेट घेतली.

तत्पुर्वी, पाकिस्तानने नाणेफेक जिंकून प्रथम फलंदाजी करण्याचा निर्णय घेतला होता. मात्र, पाकिस्तानचा संघ 19.2 षटकात 108 धावांवर सर्वबाद झाला. पाकिस्तानकडून सिद्रा अमीनने सर्वाधिक 25 धावा केल्या.

तिच्याव्यतिरिक्त केवळ तौबा हसन आणि फातिमा सना या दोघींनाच 20 धावांचा टप्पा पार करता आला. या दोघींनीही प्रत्येकी 22 धावा केल्या. तसेच मुनीबा अलीने 11 धावा केल्या.

भारताकडून गोलंदाजी करताना दिप्ती शर्माने सर्वाधिक 3 विकेट्स घेतल्या. तसेच पुजा वस्त्राकर, रेणुका सिंग ठाकुर आणि श्रेयंका पाटील यांनी प्रत्येकी 2 विकेट्स घेतल्या.