BCCI President Election : CSK चे सर्वेसर्वा श्रीनिवासन यांनी गांगुलीची गेम केली?

BCCI President Election Sourav Ganguly S Srinivasan : सध्याचा बीसीसीआयचा अध्यक्ष सौरभ गांगुलीला सर्वोच्च न्यायालयाच्या अनुकूल निर्णयानंतरही अध्यक्षपदाची दुसरी टर्म देण्यात येणार नाहीये. बीसीसीआयची सर्वसाधार वार्षिक बैठक ही 18 ऑक्टोबरला होणार आहे. या बैठकीत माजी खेळाडू रॉजर बिन्नी यांची बीसीसीआयचे नवे अध्यक्ष म्हणून बिनविरोध निवड जवळपास निश्चित मानली जात आहे. दरम्यान, सौरभ गांगुली दुसऱ्या टर्मसाठी इच्छूक असून देखील त्याला विरोध करण्यात आला. हा विरोध करण्यात बीसीसीआयचे माजी अध्यक्ष आणि चेन्नई सुपर किंग्जचे सर्वेसर्वा एस. श्रीनिवासन आघाडीवर होते अशी माहिती पीटीआयने दिली.

सौरभ गांगुली बीसीसीआय अध्यक्षपद सोडण्यास तयार नव्हता. मात्र त्याला पद सोडण्यास भाग पाडण्यात आल्याने तो खूप निराश झाला आहे. माध्यमांमध्ये सौरभ गांगुलीला बीसीसीआय अध्यक्षपदाऐवजी IPL चेअरमन पदाची ऑफर देण्यात आली होती. मात्र सौरभ गांगुलीने याला नकार दिला. दरम्यान, भारतीय निवडसमितीचे माजी सदस्य रॉजर बिन्नी यांनी अध्यक्षपदासाठी आपला अर्ज दाखल केला. बीसीसीआयचे सध्याचे उपाध्यक्ष राजीव शुक्ला यांनी या गोष्टीला दुजोरा देत ही निवडणूक बिनविरोध होण्याचे संकेत देखील दिले.

पीटीआयली बीसीसीआयच्या एका सूत्राने दिलेल्या माहितीनुसार 'सौरभ गांगुलीला IPL चेअरमन पदाची ऑफर देण्यात आली होती. मात्र त्याने ती नम्रपणे नाकारली. त्याला बीसीसीआयचे अध्यक्षपद भुषवल्यानंतर त्याच्यात उपसमितीत पद भुषवायचे नव्हते. त्याने 11 ऑक्टोबरला नवी दिल्लीत झालेल्या बैठकीत पुन्हा बीसीसीआय अध्यक्षपद भुषवण्याची इच्छा व्यक्त केली.'

मात्र याच बैठकीत एस. श्रीनिवासन यांनी भारताच्या माजी कर्णधारावर अकार्यक्षम म्हणत टीका केली. सौरभ गांगुलीने बीसीसीआयच्या ब्रँडला धक्का पोहचवला असल्याचा आरोप देखील त्यांनी केला. या घटनाक्रमानंतरच सौरभ गांगुली हा पुरेसा पाठिंबा न मिळाल्यामुळे बीसीसीआयचा अध्यक्ष होणार नाही अशा बातम्या माध्यमांमध्ये झळकल्या.