Sri Lanka Vs India Asia Cup 2023 : पाकिस्तानच्या वेगवान माऱ्याला चोख प्रत्युत्तर देत कोलंबोच्या प्रेमदासा स्टेडियमवर 356 धावांचा डोंगर उभारणाऱ्या टीम इंडियाला याच मैदानावर श्रीलंकेच्या फिरकीपटूंनी गुडघ्यावर आणले.
फिरकीला साथ देणाऱ्या खेळपट्टीवर भारताची तगडी फलंदाजी 213 धावांमध्ये पॅव्हेलियनमध्ये पोहचली. श्रीलंकेच्या अवघ्या 20 वर्षाच्या दुनिथ वेल्लालागेने भारताचा निम्मा संघ गारद केला. त्याला पार्ट टाईम गोलंदाज चरिथ असलंकाने 4 विकेट्स घेतल्या. भारताकडून कर्णधार रोहित शर्माने सर्वाधिक 53 धावा केल्या.
नाणेफेक जिंकून भारताने पहिल्यांदा फलंदाजी करण्याचा निर्णय घेतला. जोपर्यंत श्रीलंकेचे वेगवान गोलंदाज गोलंदाजी करत होते तोपर्यंत भारतीय सलामीवीर रोहित - शुभमन दादागिरी करत होते. त्यांनी 11 षटकात नाबाद 80 धावा केल्या.
रोहित शर्माने आशिया कपमध्ये सलग तिसऱ्या सामन्यात अर्धशतकी खेळी केली. मात्र वेल्लालागे गोलंदाजीला आला अन् त्याने पहिल्याच चेंडूवर शुभमन गिलचा त्रिफळा उडवला. यानंतर भारतीय संघाची फलंदाजी ढेपाळली. विराट, रोहित देखील पाठोपाठ बाद झाल्यानंतर केएल राहुल आणि इशान किशन यांनी डाव सावरत चौथ्या विकेटसाठी 63 धावांची भागीदारी रचली.
मात्र ही भागीदारी वेल्लालागेनेच फोडली. त्याने 39 धावा करणाऱ्या राहुलला पॅव्हेलियनचा रस्ता दाखवला. यानंतर असलंकाने इशान किशनला 33 धावांवर बाद करत भारताचा सेट फलंदाज माघारी धाडला. भारताचे चार मोहरे टिपणाऱ्या वेल्लालागेने आपल्या अखेरच्या षटकातील शेवटच्या चेंडूवर हार्दिक पांड्याला बाद करत भारताला मोठा धक्का दिला.
यानंतर भारतीय संघ सावरलाच नाही. रविंद्र जडेजा देखील असलंकाच्या गोलंदाजीवर 4 धावा करून माघारी फिरला. असलंकाने जसप्रीत बुमराहला 5 धावांवर तर पुढच्याच चेंडूवर कुलदीप यादवला शुन्यावर बाद करत आपली चौथी शिकार केली.
भारताच्या 186 धावांवर 9 विकेट्स गेल्यानंतर अक्षर पटेलने मोहम्मद सिराजच्या साथीने भारताला कसे बसे 200 च्या जवळ पोहचवले. मात्र लंकेच्या फिरकीपटूंनी टिच्चून मारा करत अक्षर पटेलला मोठा फटका मारण्याची संधी दिली नाही. अखेर भारताने 47 व्या षटकात पाऊस आला.
पाऊस थांबल्यानंतर अक्षरने धावांची गती वाढवत भारताला 200 पार पोहचवले. मात्र शेवटच्या षटकात अक्षर पटेल 26 धावांवर बाद झाला अन् भारताचा डाव 213 धावात संपुष्टात आला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
