India Vs Pakistan ICC : पलटी मारली तर... आयसीसीने पाकिस्तानला दिला सज्जड दम

India Vs Pakistan ICC World Cup 2023 : आयसीसीने नुकतेच भारतात होणाऱ्या वनडे वर्ल्डकपचे पूर्ण वेळापत्रक जाहीर केले. पाकिस्तानने भारतासोबतचा अहमदाबाद येथे होणारा सामना आणि अफगाणिस्तान सोबतचा चेन्नईत होणारा सामना इतर ठिकाणी हलवण्याची मागणी केली होती.

मात्र आयसीसीने ही मागणी धुडकावून लावली. यानंतर पाकिस्तान भारतात वर्ल्डकप खेळण्याबाबत अधांतरी वक्तव्य करत आहे.

पाकिस्तान क्रिकेट बोर्ड भारतातील वर्ल्डकप खेळण्याचा निर्णय हा सरकारवर सोपवून रिकामे झाले आहे. यानंतर आता आयसीसीने पाकिस्तानला कराराची आठवण करून देत एकप्रकारे सज्जड दम दिला.

आयसीसीचे सध्याचे अध्यक्ष जॉर्ज बार्कले म्हणाले की, 'पाकिस्तानने वर्ल्डकपमध्ये सहभागी होण्यासाठी करार केला आहे. आम्ही आशा करतोय की पाकिस्तान या करारापासून पलटणार नाही आणि भारतात वर्ल्डकप खेळण्यास येईल. वर्ल्डकपमध्ये सहभागी होणाऱ्या सर्व संघांना त्यांच्या देशातील नियम आणि कायदे पाळणे बंधनकारक असते. आम्ही याचा सन्मान करतो. आम्हाला पूर्ण विश्वास आहे की पाकिस्तान वर्ल्डकप खेळण्यासाठी भारतात नक्की येईल.'

वनडे वर्ल्डकपचे वेळापत्रक जाहीर होण्यापूर्वीच पाकिस्तान क्रिकेट बोर्डाने नखरे करण्यास सुरूवात केली होती. पाकिस्तानने मंगळवारी एक वक्तव्य प्रसिद्ध करून त्यांना सरकारकडून वर्ल्डकपसाठी भारतात जाण्याबाबतचे ना हरकत प्रमाणपत्र मिळालेले नाही. त्यामुळे पाकिस्तान भारतात येणार की नाही याबाबतची स्थिती आताच स्पष्ट करता येणार आहे.

आयसीसी आणि बीसीसीआयने पीसीबीची अफगाणिस्तान अन् ऑस्ट्रेलियाविरूद्धच्या सामन्याचे ठिकाण बदलण्याची विनंती धुडकावून लावली. मिळालेल्या माहितीनुसार पाकिस्तान भारतासोबत अहमदाबादमध्ये सामना खेळण्यास तयार नव्हती. मात्र बीसीसीआयने आयसीसीला पाठवलेला ड्राफ्ट आयसीसीने फायनल करत वर्ल्डकपचे वेळापत्रक जाहीर केले.

पाकिस्तानच्या या विनंतीमुळेच वनडे वर्ल्डकपचे वेळापत्रक जाहीर होण्यास उशीर होत होता. अखेर वेळापत्रक जाहीर झालं. आयसीसीने पाकिस्तानची विनंती मान्य केली नसल्याचे सिद्ध झाले. आता पाकिस्तानला 15 ऑक्टोबरला भारतासोबत अहमदाबादमध्येच खेळावे लागणार आहे. तर अफगाणिस्तानच्या फिरकीचा चेन्नईतच सामना करावा लागणार आहे.

(Sports Latest News)