ICC T20I Rankings : सूर्यकुमार यादवची चौथ्या स्थानावर घसरण

ICC T20I Rankings : पाकिस्तानचा यष्टीरक्षक आणि सलामी फलंदाज महम्मद रिझवान सध्या जबरदस्त फॉर्मात असून बुधवारी जाहीर झालेल्या आयसीसी टी-२० मानांकनामध्ये फलंदाजीत त्याने बाबर आझमला मागे टाकत अव्वलस्थानावर झेप घेतली आहे. अव्वलस्थानासाठी रिझवान, बाबर आणि भारताचा सूर्यकुमार यादव यांच्यात चुरस होती. मात्र, सूर्यकुमार चौथे स्थानच मिळवू शकला.

रिझवान सध्या सुरू असलेल्या आशिया करंडकात जबरदस्त फॉर्मात असून तीन सामन्यांत त्याने १९२ धावा केल्या आहेत. त्याने हाँगकाँग आणि भारताविरुद्धच्या सामन्यात अनुक्रमे ७८ व ७१ धावा केल्या. यामुळेच तो दुसऱ्या स्थानावरून अव्वलस्थानावर विराजमान झाला. टी-२० आयसीसी मानांकनामध्ये अव्वलस्थानावर विराजमान होणारा रिझवान केवळ तिसरा पाकिस्तानी फलंदाज होय. यापूर्वी मिस्बा उल हक आणि बाबर आझम यांनी अव्वलस्थान मिळविले होते. बाबर तब्बल ११५५ दिवस अव्वलस्थानावर होता, असे आयसीसीने म्हटले आहे. या रँकिंगमध्ये पहिल्या दहांत सूर्यकुमारचा अपवाद वगळता एकही भारतीय फलंदाज स्थान मिळवू शकला नाही. श्रीलंकेविरुद्ध केलेल्या ७२ धावांमुळे रोहित शर्माने चार क्रमांकाची सुधारणा करताना १३ व्या क्रमांकावर झेप घेतली.

फिरकीपटूंचे वर्चस्व

गोलंदाजीत श्रीलंका आणि अफगाणिस्तानच्या फिरकीपटूंनी आपल्या रँकिंगमध्ये जबरदस्त सुधारणा केली. अफगाणिस्तानच्या मुजीब उर रहमानने तीन क्रमांकाची सुधारणा करताना वेस्ट इंडीजच्या हुसेन अकिलसोबत संयुक्तपणे सहावे स्थान मिळविले आहे. आशिया करंडकात तीन सामन्यांत तीन बळी घेणाऱ्या श्रीलंकेच्या महीश तिक्षणाला त्याचा पुरस्कार मिळाला असून त्याने दहा खेळाडूंत स्थान मिळविले आहे.