Womens World Cup : हरमनप्रित एकटी पडली; भारतीय संघाचा पराभव

ICC Womens World Cup 2022 : महिला वर्ल्ड कप स्पर्धेतील दुसऱ्या सामन्यात भारतीय संघाला पराभवाचा सामना करावा लागला. न्यूझीलंडने दिलेल्या 261 धावांचा पाठलाग करताना हरमनप्रित कौरनं अर्धशतकी खेळी केली. पण तिचे हे अर्धशतक व्यर्थ ठरले. यजमान न्यूझीलंड संघाने भारतीय महिला संघाला 198 धावांत रोखत 62 धावांनी विजय नोंदवला. भारतीय संघाची कर्णधार मिताली राज हिने टॉस जिंकून पहिल्यांदा फलंदाजी करण्याचा निर्णय घेतला होता. एमीनं (Amy Satterthwaite) 84 चेंडूत केलेल्या 75 धावा आणि अमेलया (Amelia Kerr) हिने 64 चेंडूत केलेल्या 50 धावांच्या जोरावर न्यूझीलंड महिला संघाने निर्धारित 50 षटकात 9 बाद 260 धावा केल्या होत्या. या धावांचा पाठलाग करताना मिताली राजने 32 आणि हरमनप्रित कौर 71 धावा वगळता कोणालाही मोठी खेळी करता आली नाही.

यश्तिका भाटिया (Smriti Mandhana) आणि स्मृती मानधना (Smriti Mandhana) या जोडीनं भारतीय संघाच्या डावाला सुरुवात केली. धावफलकावर अवघ्या 10 धावा असताना स्मृतीच्या रुपात टीम इंडियाला पहिला धक्का बसला. तिने 6 धावा करुन तंबूचा रस्ता धरला. तिची जागा घेण्यासाठी आलेल्या दीप्तिलाही नावाला साजेसा खेळ करता आला नाही. ती 5 धावा करुन बाद झाली. सुरुवातीच्या पडझडीतून सावरुन कर्णधार मिताली राज (Mithali Raj) आणि हरमनप्रितनं (Harmanpreet Kaur) संघाचा डाव सावरण्याचा प्रयत्न केला. पण अमेलयानं मितालीला बाद करत तिने कर्णधार-उपकर्णधार जोडी फोडली. या दोघींनी चौथ्या विकेट्ससाठी 47 धावांची खेळी केली.

मिताली बाद झाल्यानंतर हरमनप्रित कौरनं एका बाजूनं किल्ला लढवण्याचा प्रयत्न केला. दुसऱ्या बाजूने एका मागून एक विकेट पडत राहिल्या. रिचाला खातेही उघडता आले नाही. स्नेह राणा 18 (28) आणि पुजा वस्त्राकर 6 (16) स्वस्तात माघारी फिरल्या. हरमनप्रित कौरनं 4 चौकार आणि 2 षटकाराच्या मदतीने 63 चेंडूत 71 धावांची खेळी केली. तिच्या या खेळीशिवाय भारतीय संघातील अन्य कुणालाही मैदानात तग धरता आला नाही.