WTC Final : पहिल्या सेशनमध्ये पावसाची बॅटिंग

ICC World Test Championship Final : साउदम्टनच्या मैदानात पावसाने बॅटिंग सुरु केल्यामुळे टॉस झालेला नाही. पहिला सेशन पाऊसच गाजवणार असल्याचे दिसते. स्थानिक हवामान खात्याने वर्तवलेल्या अंदाजानुसार पाच दिवस ढगाळ वातावरण आणि पावसांच्या सरींचा अंदाज वर्तवण्यात आलाय. आयसीसीने जो राखीव दिवस ठेवलाय त्यात सूर्यप्रकाशाचा अंदाज वर्तवण्यात आलाय. त्यामुळे पास दिवस खऱ्या अर्थाने पावसाच्या कसोटीचे असणार आहेत. (ICC World Test Championship Final 2021 India vs New Zealand toss has been delayed Due To Rain Southampton) भारत आणि न्यूझीलंड यांच्यात 18 ते 22 जून दरम्यान पहिली वहिली टेस्ट चॅम्पियनशिप स्पर्धा खेळवली जात आहे.

या स्पर्धेचे जेतेपद कोण पटकवणार याची चर्चा रंगत असताना दोघात तिसरा चॅम्पियन होण्याच विसरा! हा पेच पावसाने निर्माण केलाय. पावसाच्या व्यत्ययामुळे पहिल्या दिवसाचा खेळ वेळेत सुरु झालेला नाही. ताईट फाइट होईल पाहण्यासाठी उत्सुक असलेल्या क्रिकेट प्रेमींच्या आनंदावर पाणी फेरण्याची दाट शक्यता दिसते. पुढच्या 24 तासात पावसाची ये जा सुरु राहणार असल्याचं हवामान विभागाने म्हटलं आहे. 18 जूनला साउदम्प्टनमध्ये 12 ते 16 अंश सेल्सिअस तापमान असणार आहे. दिवसभर हवा थंड राहील. पाचही दिवस कसोटी अशाच वातावरणात होईल. त्यामुळे पावसाची टांगती तलवार सामन्यावर कायम राहणार आहे.

कसोटीतील वर्ल्ड कप समजल्या जाणाऱ्या या स्पर्धेचा निकाल हा एका कसोटीपेक्षा बेस्ट 'ऑफ थ्री' अशा पद्धतीने व्हावा, अशी ईच्छा भारतीय संघाचे कोच रवि शास्त्रींसह अनेक दिग्गज क्रिकेटर्संनी व्यक्त केली होती. पावसामुळे सामन्यावर संकटाचे ढग दाडल्यानंतर अनेकांना आता हा विचार पटला असेल. पाच दिवसांच्या कसोटी सामन्यात आयसीसीने केवळ एक दिवसच अतिरिक्त दिलाय. स्थानिक हवामान खात्यानुसार तो एकच दिवस पावसाशिवाय असेल, असा अंदाज वर्तवण्यात आलाय. त्यामुळे कसोटीचा निकाल लागण्याची शक्यता कमी होण्याची शक्यता निर्माण झाली आहे. जर पावसाच्या व्यत्ययामुळे सामना अनिर्णित राहिला तर पहिल्या वहिली आयसीसी चॅम्पियनशिप ट्रॉफी दोन्ही संघांना संयुक्तपणे देण्यात येईल, असे आयसीसीने अगोदरच स्पष्ट केले आहे.