VIDEO : हिटमॅननं 6 कोटींच्या गड्याला Eden Gardens वर दाखवल्या चांदण्या

कोलकाता : ईडन गार्डन्सच्या मैदानात रोहित शर्माची वादळी खेळी पाहायला मिळाली. तीन सामन्यांच्या मालिकेतील पहिल्या सामन्यात कर्णधार रोहित शर्मानं पहिल्यांदा गोलंदाजी करण्याचा निर्णय घेतला होता. वेस्ट इंडीजच्या संघाला भारतीय गोलंदाजांनी निर्धारित 20 षटकात 7 बाद 157 धावांवर रोखलं. कॅरेबियन संघानं दिलेल्या 158 धावांचे टार्गेट परतवण्यासाठी रोहित शर्मा आणि ईशान किशन मैदानात उतरले. या जोडीनं संघाला दमदार सुरुवात करुन दिली.

भारतीय संघाच्या डावाच्या सुरुवातीलाच रोहित शर्मा (Rohit Sharma) याने आक्रमक पवित्रा घेतला. दुसऱ्या षटकात त्याने शेफर्डला उत्तुंग षटकार खेचला. हा फक्त ट्रेलर होता... खरा पिक्चर पाहायला मिळाला तो भारतीय संघाच्या डावातील चौथ्या षटकात रोहितनं केलेल्या फटकेबाजीतून. ओडेन स्मिथच्या (Odean Smith) पहिल्या चेंडूवर रोहितनं खणखणीत चौकार खेचला. दुसऱ्या आणि तिसऱ्या चेंडूवर स्मिथने सिंगल धावा दिल्या. त्यानंतर रोहितनं पुन्हा जोरदार फटकेबाजी केली. त्याने चौथ्या चेंडूवर षटकार, पाचव्या चेंडूवर चौकार आणि षटकाचा शेवच षटकाराने केला. या एका षटकात टीम इंडियाला 22 धावा मिळाल्या.

रोहित शर्मानं ईशान किशनच्या साथीने अर्धशतकी भागीदारी करत खास विक्रमही केला. सलग सातव्या सामन्यात भारतीय सलामी जोडीनं अर्धशतकी भागीदारी पूर्ण केली. Powerplay मध्ये टीम इंडियाने 58 धावा कुटल्या. रोस्टन चेसनं रोहितच्या खेळीला ब्रेक लावला. पण तोपर्यंत खूप उशीर झाला होता. रोहितनं 200 + स्ट्राईक रेटनं 19 चेंडूत 40 धावा करत संघाच्या विजयाचा पाया रचला होता. रोहितनं ज्या 6 कोटीच्या गड्याची हवा ताईट केली त्या ओडेन स्मिथनंच त्याचा कॅच घेतला.

आयपीएल लिलावात स्मिथला मिळाली होती मोठी रक्कम

भारत आणि वेस्ट इंडीज यांच्यातील टी-20 मालिकेपूर्वी बंगळुरुमध्ये आयपीएलचा मेगा लिलाव पार पडला. या लिलावात पंजाब किंग्जनं कॅरेबियन अष्टपैलू ओडेन स्मिथवर पैशांची बरसात केली होती. 6 कोटी रक्कम देऊन पंजाबने त्याला आपल्या ताफ्यात घेतलं. रोहितनं त्याची अक्षरश: हवा काढली.