IND vs SL : श्रीलंकेविरुद्धच्या मालिकेसाठी रोहित, विराट कोलंबोत दाखल

कोलंबो : कर्णधार रोहित शर्मा, विराट कोहलीसह काही खेळाडू श्रीलंकेविरुद्धच्या एकदिवसीय मालिकेसाठी कोलंबोत दाखल झाले. ही एकदिवसीय मालिका २ ऑगस्टपासून सुरू होत आहे. सूर्यकुमार यादवच्या नेतृत्वाखाली खेळत असलेल्या भारतीय संघाचा अखेरचा टी-२० सामना उद्या होत आहे. हा सामना पाल्लेकेल येथे होणार आहे, तर रोहित आणि विराट, तसेच इतर खेळाडू कोलंबोत सरावासाठी उतरले तेव्हा पावसाने त्यांचे स्वागत केले.

रोहित, कोहली, कुलदीप यादव हे खेळाडू बरोबर महिन्यानंतर आज पुन्हा क्रिकेटच्या मैदानावर उतरले. २९ जून रोजी भारताने वेस्ट इंडीजमध्ये दक्षिण आफ्रिकेचा पराभव करून टी-२० विश्वकरंडक जिंकला होता.

श्रीलंकेविरुद्धच्या या एकदिवसीय मालिकेद्वारे श्रेयस अय्यर प्रदीर्घ कालावधीनंतर भारतीय संघात पुनरागमन करणार आहे. त्यामुळे त्याच्यासाठी ही मालिका महत्त्वाची ठरणार आहे. डिसेंबर २०२३ मध्ये तो आपला अखेरचा आंतरराष्ट्रीय सामना खेळला होता.

एकदिवसीय संघात दिल्लीचा वेगवान गोलंदाज हर्षित राणा याच्याकडेही अधिक लक्ष असणार आहे. आयपीएलमध्ये कोलकता संघातून खेळताना त्याने चांगली छाप पाडली होती. त्यामुळे त्याच्यासाठी भारतीय संघाचे दरवाजे उघडले गेले. एकदिवसीय मालिकेतील सामने २, ४ आणि ७ ऑगस्ट रोजी होणार आहेत